15        PÍCOLO BOCIOL  SPINÀ

Oncó¹ la Maria (la sòlita Maria), la me ga stralunà! Ela la stà ‘inbastendo’ on² romanzo co i fiochi e la me conta la trama par filo e par segno. Se sà, l’amor el fà ruar tute le robe e, sto ‘arcano’, el xe la sconta passion, che la para torno sto libro ecessional. El mas-cio, da che mondo xe mondo, el xe chel che el trà l’amo par primo, sperando de guantar na bela ‘spìgola’. La fèmena, da che mondo xe mondo, la fà senpre la squìnsia³ e la sguissa via pi sguelta de na bisata⁴. Calche volta l’aguèlo⁵ el rancura, calche volta nò. L’amor el xe el nerbo che l’infèrvora libro, omo, dòna e la provèta⁶ artista! La Maria, la ga na melona de prima qualità e, se la s’inpunta, no la la mola pi e la vol senpre dir l’ùltimo verbo. A la fin de ogni situassion, ela la vol senpre vinta e, par de pi, co tanto de rason ossequià. Te poi imaginarte come che la stà drio a la trama de sta òpara e, tira o mola, le robe le deve finir come che finisse i salmi: in gloria! “Ciaschedun dal propio cor l’altrui misura”, rèssita on dito! El cor de la Maria (la scritora), chel de elo (el spasimane), chel de ela (la concupìa), i dindolava⁷ come se i fusse on cor úgnolo⁸. “A go vossudo, senpre a go vossudo, propio tanto a go vossudo”⁹, diséa on gran personajo! Sto chì, a la fin, el ga cantà vitoria. Anca el protagonista del romanzo de la Maria no el la molava de morosar¹⁰ e el voléa cantar: chìchirichìii!… Elo (el protagonista) inmulà, de rife o de rafe, el le gavéa tentà tute ma, ela (la protagonista), la gera na fata fatà e la brissiava¹¹ via, ridaciàndoghe drio. Porocan, el poro tosato! Saralo stà inamorarà? No saralo stà inamorà? Sarala stà sol na fissa o na casta devossion ? Ela, la bela, volévela o no volévela che maurasse calcossa? Elo el lo savéa, ela la lo savéa, la Maria (la scritora) la lo savéa e, mi, ca no lo savéo, scorlavo¹² la suca! Racomanda el vecio proverbio: “Da mojer e marìo, tìrate indrìo!” Mi passo, bìscolo¹³, vago¹⁴! Elo, l’intrigon, che no el gera par gnente bauco, el canbia tasto de l’òrgano, scuminsiando a sonar na mùsica dolse dolse. 

Se sà: “se ciapa pi mosche co na giossa de miele che co na bóte de asedo”¹⁵, sentenzia el dìto! Mi, tuto amirà, scoltando la vosse de la Maria, che tuta infervorà la portava vanti el so ‘filò’, a go sentìo la strofa, che la me ga inmagà. Lu, el ‘prìnsipe azuro’, el se gera slansà in on volo passionà, stragunfio de poètica e el ghe susura: “Me pìcol bociol spinà, quando te te spanaré e te spandaré el to parfumo dessora de mi!?…”