18        LE FOJE E LE RAISE^*

Gera rivà la PRIMAVERA e finamente¹ gavèa riscominsià la vita par el mondo vegetal. Anca on gran e bel àlbaro el se gera svejà dal so son e, pien de contentesse, el se dava el so da far parché le robe, che da lu le dipendéa, le nasse ben. El ga tacà co le raise disèndoghe: “ Suvìa, cari pàpari², xe rivà l’ora de svejarse. Scominsié a ciucionar l’aqua e i minerai de la tera. Sto ano dovemo far mejo de l’ano passà. Mi farò la me parte!” I lavriti de le raisete, anca de quele pi picinine, le se ga messo de lena a supegar³. Pian pianelo le robe ciucià da i lavriti de le raise, le xe passà ne la soca e da sta chì al tronco e da sto chì a i rami e a i ramiti e là, indove ca ghe stava i oci⁴ , xe nati i buti e, infin, da sti chì xe nate le foje. L’àlbaro intier el gera tuto on godamento⁵ . Ogni so parte la gavéa fato el so dover.

Pian pianeto xe rivà l’ISTÁ e co ela l’abondansa del sorapì. E lì, propio có tuti i podéa star ben, xe nate le lagne e le barufe. Ga scominsià el cao de le lagnanse le foje. Eco le so gné gné: “Mi a só pi fortunà, la diséa na foja, parché a só girà verso el sol e me lo godo da la matina a la sera”. Na foja, da chel’altra parte, la ribatéa: “Cara mia, mi a só pi bela e a go la pelesìna pi verde, fresca e velutà parché el sol no el me la seca, scotàndola massa”. Cari leturi mii, imagineve pure altre ciance, tute storie da du schei, parò a on serto momento anca chele ciàcole le ga vudo na fine. Lora, le foje par mòvar boca e tacar boton, in grupo le se ga rivoltà contro le raise. Eco i discursi: “Care mie, noialtre stemo ne i piani alti, nòbili. Quassù se svanpolemo quanto ca volemo e quanto ne piase. Vedemo na mota de robe: i osei, el sol, le montagne, le vali, piante de tute le rasse, tanti animai, i torentei co l’aqua e, de note, amiremo le stéle e la luna. Voialtre, invesse, ficà sóto lì, no ve godì n’aca straca!” Le raise, umilià, le ga risposto: “Si si, ve dè tante arie parché ve vedì bele e grasse. No pensé mia che se noialtre no ve gavìssimo mandà sù el mùgo⁶ , voialtre no sarissi gnanca nate? Ridì, pore macache, canté come le sigale, ma vedarì che la festa la finirà e cascaré par tera”. Pian pianelo xe rivà l’AUTUNO e le foje le xe diventà fiape e zale. Una par volta, come che el so manegheto el se faséa lofio e seco, le croava zó e, lì, leme leme, le se ga smarsìe. Infin xe rivà l’INVERNO el qual, no vardando nissun int’el muso, el ga messo tutto in sesto, a l’istesso livelo: foje e raise sóto la tera!

Chissà se par noialtri òmeni, sia par chei che i stà in alto come par chei che i se cata in basso, no sarìa el caso de concludar sta storieta col deto de Orassio: “Pulvis et umbra sumus”⁷ (a sémo pòlvare e onbra)!