19        EL DITO "VISENTINI MAGNAGATI" EL XE INTERNASSIONAL!

A Roma vivo da tanti ani, quasi la metà de la me vita e, de sti ani, quasi la metà fasendo el tassista. Credo de èssar l’ùgnolo ‘tassinaro’ vèneto che, dopo tre parole, capisse anca on orbo ca a só del nord. I pi tìmidi i stà ziti e inpaurìi i se dise: “Spero che no el me porti a Milan. Se po’ el xe de Venessia, Maria ve’, el xe bituà a nar co i remi e no col volante. Porocàn¹ mi, spero che no el me copi in sto baruscaro de tomòbili. Lu, là, el va par i canai inpienà de aqua lissia lissia e no lissegà co i sanpietrini e co na mota de buse. Spero de rivar san e salvo. Par sicuressa, intanto, mi me racomando a Sant’Antonio e a San Genaro, che i xe du Santi potenti!” Calchedun pi spiritoso e sensa pili su la lengua, anca par tacar boton, el vien for: “Eh eh, el la ga fregà na bela romanina, vèro?!” E mi, soratuto se chi che parla la xe fèmena (xe mejo no còrar ris-ci e parlar suito e ciaro): “Eh nò, cara ela. Mi a só oseleto de bosco. Tal a só e tal a vojo restar. Mi preferisso nar da fior in frasca, becolando chel che passa el convento”!... I pi onbriosi i dimanda: “Ma lu cognòsselo Roma?” ‘Ipso facto’, par chietarli, a ghe sgrano i nomi de le strade  da indove sémo a indove nemo e sbirsiando nel speceto retrovisor vedo che i torna in siera. A chei che i me dimanda: “De indove zelo, capo?”, a ghe digo: “De Vicensa.” Quasi tuti i me ingropa la vosse in gola disendo: “Ah, vicentini mangia-gatti”! Dopo, chissà mai parché, i xe in tanti che, volendo far bela monstra de cultura, i serca de nar vanti co la filastroca: padovani gran dottori, veneziani gran signori e, e… e quasi tuti, lì, i se inbalba. Cussì, tante volte me toca conpletar dal punto ‘moro’ e rivar a la fin de la filastroca e… scuminsio: venessiani gran signori, padovani gran dotori, visentini magnagàti², veronesi tuti mati, udinesi castelani, col cognome de furlani, trevisani magnatripe, rovigoti bacco e pippe, e Belun?… poro Belun, ti sì propio de nissun! Aromai sta storiela la go sentìa e ressità cussì tante volte che la me va for da le rece. Ma cossa vuto che sia, star a Roma o star a Vicensa, senpre in Italia se xe. Par mi el star a Roma la xe stà na lìbara sielta! Se la storia la finisse chì, la sarìa na roba nostrana e invesse nò: sentì come sto dito el gira par el mondo! Nando a curiosar in difarenti continenti, par quasi on ano a me só fermà a New York. Calche volta se magnava a casa e calche volta for de casa: a ‘little Italy’, al ‘green village’ o nel quartier cinese. In sto ùltimo posto a xe capità el fato, che desso ve conto. Gèrimo in sinque e gavìvimo inpienà na tola. Te sè come che i xe i taliani: i xe ciacoluni e i parla senpre a vosse alta e inboressà. Cussì, fasendo baldoria, a gavìvimo tirà l’atension de on porocan, che el stava, molo come on cagneto bastonà, sentà a on tavolin poco lontan. Quando ca stàvimo par alsarse e nar de longo, se vede che el gavarà ciamà tute le so forze e vignendo arente el dise co vosse inpastelà: “Scusè, mi a só talian e no capisso na òstrega del parlar de qua. Ve despiase sa me sento du minuti e smovo na s-cianta la lengua? E noialtri: “Ma nò. Che el se senta! Cossa bèvelo”? E se scominsia a ciacolar. A on serto punto lu el dimanda: “De indove sio?” E ognun el dise de dove el xe e mi digo: “ Mi a só de Vicensa”! E lu: “Ah, vicentini mangia-gatti!” E dàghela, digo drento de mi: “Varda on po’ sa me toca vigner ne i Stati Uniti par sentirme dir ca a só on magnagati” Comunque tuto finisse in ridarela. Eco n’altra storiela e stavolta capità in America Latina e de preciso in Mexico. Desso ve conto. Sercando el sol, el caldo e la me sità ideal, a go tentà de inpiantarme anca inte sto paese. Na volta a só nà a visitar la piràmide del Sol. Só nà sù, me ga piasso, só tornà zó. Gavéo le ganbe che le faséa jàcomo e patìvo na sé da morir. Rivà al bar, a me só comandà on bel goto de sugo de naransa. Sicome al banco se catava na mota de zente, a go urtà el gunbio de on messican e, dopo le scuse, gavemo scanbià do parole. La coversassion la nava vanti a la sanfasson³. A on serto momento, lu el me dimanda: “Italian, vèro”? “Si” digo. Lu: “Bela l’Italia! Paolo Rossi, gran canpion. Donde vien, señor. Da Roma, Napoli, Milan”? “Da Vicensa”. E lu, s-ciopando dal rìdar: “Da Vicensa? Visentiños mañagatos!” Na cortelà in cor e la lama la sarìa ussìa bela-neta, sensa la pi pìcola macia de sangue! A só stà al zugo e go ridesto. Eco come che xe la vita, cari mii. El mondo el xe tondo e propio picinin. Milan el sarà on gran Milan e a Roma i gavarà el Papa ma, penso, che Vicensa no la xe par gninte de manco. Infati, se oltra a i confini de casa nostra, in U.S.A. o in America Latina se sente repèter sto ritornel, vol dir che anca Vicensa e el so ‘dito’ i xe internassional. Mi me ne vanto e me tegno in bon!

Nota. “Paese ca te vé, dito ca te cati. Varda on po’ ti, a Roma, el ‘gato’ el xe ciamà ‘lièvro’ de gorna!