20        TRI MORTI CHE PARLA!

Stassera fasemo resssitr tri personaji vissùi tanti, ma tanti ani indrìo. El primo el se ciama Augusto e de lu i dise che el xe ga portà ben. Elo el xe famoso, soratuto, parché el guernava el mondo intiero quando che xe nato Gesù Cristo e co sto avenimento úgnolo a ga scominsià l'era cristiana. Sto gran inperador, tirando l'ùltimo fià, el ga mormorà: "Acta est fabula"¹ ! De lu, tuti i la la conta ben e, cussì, el xe passà a la storia come on brao e bon’omo. On altro personajo, che el xe passà a la storia e del qual, quando che se ghe ne parla, quasi tuti i ghe ne dise straje, el xe Neron. Se dise che el ghe ne ga fate de cote e de crue. Altri, puchi a dir el vèro, i conta che el gera on genio no capìo, on gran architeto e on amante de le robe bele. Sto qua, stirando le lache, el ga sentenzià: "Qualis artifex pereo"² ! De lu xe restà on saco e na sporta de question. El terso personajo el xe Setimio Severo. I dise che el gera on omo tuto de on tòco, no crumiro, ma pi che tento in tute le robe, vuto co i altri, vuto co elo istesso. La zente del so tenpo (istessa roba la xe stà dita, anca, de l’inperador Antonino Pio), la zente, diséo, la ghe ga refilà el soranome: "Cumini sector"³ . A Roma, drento el foro roman, ghe xe el so arco che el lo mensona. I conta che a Roma (a Trastevere), indove desso se cata la strada drita drita ciamà: via de la Lungara, la gran preson dita “Regina Coeli” e na  mota de altre construssion, a i tenpi sui (del Setimio), sto omo, paron de chel teren lì, el lo guernasse come so ‘orto privà’. Lì, infati, se cata l’arco dito “Porta Settimiana” ⁴ . Sto omo el ga vudo on fiol co na ruela del sarvel (i dise), quadrata. Se trata de Antonino, mejo cognossùo come Caracala. Sto bravo omo (parlo del vecio Setimio), co l'ùltima sboconà de fià el ga dito: "Laboremus"⁵ ! Chei tenpi là i gera tenpi ‘pagani’, ma l'omo 'honestus' el tignéa rece drite e oci verti e, prinsipiando dal dito: 'homo naturaliter bonus', pi de qualchedun el ghe la ga fata a far robe juste e de gran valor. Fursi, anca sensa i amaestramenti de le svarià relijon l'omo, come el sostien Paolo de Tarso, essendo ‘fiol de de Dio', se el va drio al mejo che el se cata drento de elo, el pol fàrghela a conpìr robe bone, ùtili e bele!