23        EL SCARPARO E EL PECETO

Me xe senpre piasso sentìr contar le storie. Podarìa dir ca gavarìa preferìo na fiaba a on zelato. Lora, scoltando, a fantasticavo da putelo¹, desso, co i cavji grisi², a me le riconto e le rifantàstico da mauro³. Stamatina, fasendo quatro passi sul lungotèvere propio tacà⁴ a casa mia, me xe vegnù inamente la storiela de i du inamorà: el scarparo co i schei contà in scarsela e la bela fiola del sior Ménego, che el gavéa la casa propio de fronte del pìcolo esercissio⁵ del tosato. Elo e ela i gera poco pi che boce e i gavéa tanti sogni in suca e, par de pi, no essendo ancor ruinà da le ‘magagne’ de la vita, i progetava che, pena che i gavesse possudo, i se saria maridà, i gavarìa cronpà tanti fioi e i gavarìa vissudo felissi e contenti. El sior Ménego, invesse, el gavéa i oci verti e i pié ben postà par tera. Elo el sognava de catar on bon partìo, ben armà de schei par la fiola. El pare⁶, sbirsiando el far svanpìo⁷ de la tosata quando che la s’inbrocava col tosato, spionàndoli, el se ga inacorto che stava nassendo calcossa de tènaro. El caso, intrigon, on dì el li ga fati catar co la man ne la man. Ménego el se xe inrabià, el ga fato el quarant’oto e el ghe ga tegnù na paternale sacrossanta. El concludéa: “Sa ve pesco⁸ n’altra volta tacà e suli, ve smaco! Gavìo capìo”? Ghe xe du proverbi, un el dise: “L'amor no el pol star sconto” ⁹; chel'altro: “L'amor no fà bojer pignata” ¹⁰! El sior Ménego el cognosséa ben el secondo, i du inamorà i sperava de sventar el primo. Poariti, i se voléa on saco e na sporta de ben, ma no i savéa come dìrselo. Na volta, par conbinassion, ela par atirar l'atension de elo, la ga doprà on speieto col qual la ga svoltà on rajo de sol drento el negossio del so ben. Co sto fil de luse del sol, la stanseta la se ga iluminà de paca e anca la facia del spasimante la se ga fata felisse. Da chel dì, anca se i du inamorà no i podéa incontrarse e ciacolar, la femeneta, pena che so pare el gera nà de longo, la ciapava on specio che, ben doprà, el menava drito drito el ciaròr del sol propio parsora el tavolin del scarpareto. Sto rajo paréa che el disesse: “Te vojo ben te vojo tanto ben.  Pènsame ché mi te penso. Quando ca saremo grandi, se sposaremo ti col vestito moro e mi co l'àbito bianco, longo fin a i pié”! La zente del paese no la dormìa e la ridaciava¹¹ de drio de le spale del sior Ménego. Tuti i savéa tuto, salvo l’omo duro. Passa on zorno, passa on altro, a la fin, gira ca te giro, có el vecioto el se xe inacorto de l’incantamento de i du, jera massa tardi. Tuti del paese i dava rason a i du inamorà e, cussì, el Ménego par no far bruta figura e pèrdar la facia, el ga fato finta de gnente e el ga dà òrdine de pareciar na nosse da fàvola! Na vecia filastroca de stiani la farìa terminar sta storiela cussi: “E nosse nossete, candele candelete e vìssero tuti felissi e contenti, ma a mi ca stavo sóto la tola, no i me ga dà gnanca l’osso de na brasola!” ¹².