SONETTO SUI PETTEGOLEZZI

Donne, che colla grazia e con i vezzi

Avè l’arte e el poder d’innamorar,

No ve stè fra vualtre a ruvinar

Colla superbia o coi pettegolezzi.

E vualtri patroni, che sè avezzi,

Sulle povere donne a criticar,

Che andè per le botteghe a mormorar,

Che gh’avè troppa lengua e pochi bezzi,

Avvertì che l’onor xe un panno fin;

Presto presto la giozza se dilata,

Se se ghe spande suso o l’oggio o el vin.

Un panno de natura delicata

Per farlo scolorir basta un tantin,

E se stenta a nettar quando el s’imbrata.