TERZETTI IN LINGUA VENEZIANA

per le nozze di Sua Eccellenza il signor Jacopo Benzon colla nobil donna Elena Memo.

L’ultimo dì del mese dei meloni²²¹,

Al solito sentà al mio taolin²²²,

Sento una ose a dir: Ghe xe el Goldoni?

No i me lassa mai star. Mo che destin!

Ghe respondo: el ghe xe, coi denti stretti,

Mastegando la penna un pochettin.

Se i me vegnisse a domandar sonetti²²³,

Digo drento de mi, sia chi se sia,

Ghe rispondo de no senza rispetti.

Ghe n’ho fatto abbastanza in vita mia,

No so più cossa far, né cossa dir;

No ghe ne fazzo più, la xe fenia.

Che che non è²²⁴, me vedo a comparir

Sior Francesco Pitteri²²⁵ scalmanಲ⁶,

E el me dise: Ve prego a compatir,

Caro sior Carlo, se son vegnù qua

A desturbarve in tempo che scrive.

El se senta, el se suga, el chiappa fiಲ⁷.

Cossa veleu? cossa xe sta? parlè.

El me scomenza a dir che un zentilomo²²⁸

Da mi lo manda, e nol vuol dir chi el xe.

Subito ch’ho sentio sto primo tomo.

Digo drento de mi: l’ho indivinada,

O nozze, o monestier, da galantomo²²⁹.

Ei dise: V’ho da far un’imbassada,

Ma da parte de chi no ve lo digo:

Fursi lo saverè per altra strada.

So che ste cosse le ve xe d’intrigo,

E a tanti che me dà sta commission

Ghe respondo: nol pol; cusì me sbrigo.

Ma non posso cavarme²³⁰ in sta occasion;

Se tratta de servir, caro sior Carlo,

Un vostro generoso e mio paron²³¹.

Stavolta, in verità, bisogna farlo;

Feme un capitoletto, o un sonettin.

Cossa diseu? Mi stago là, e no parlo.

Vedo ch’el tira fora un bolettin,

Ch’el me varda in tel muso²³², e che pian pian

El me lo petta lಳ³ sul taolin.

Senza responder gnente el togo in man.

E al nome d’una Memo e d’un Benzon,

Subito me consolo, da cristian²³⁴.

Sior Francesco, ghe digo (e scambio ton)²³⁵.

Ste nozze le me mette in allegria,

Sfadigar me vorria per parer bon.

Ma una Commedia, che no xe fenia,

Me occupa intieramente, e un de sti dì

A redosso me vien la Compagnia²³⁶.

Son cusì stracco che non posso pì²³⁷.

Se avvicina l’autunno e el carneval.

E tutti quanti se confida in mi.

Più tosto che dir poco e che dir mal

De ste do case, de sti do novizzi,

Dirghe la verità xe manco mal.

Goldoni xe intrigà in ti so pastizzi²³⁸.

Se el podesse, gramazzo²³⁹, el lo farave;

Per i patroni l’anderia sui stizzi²⁴⁰.

In tun’altra occasion me inzegnerave

(Seguito a dir) de stuzzegar la rima,

De far quattro terzetti o quattro ottave.

Ma gh’ho tanto rispetto, e tanta stima

Per sta casa Benzon, per casa Memo,

Che ghe vol tempo da pensarghe in prima.

A tor la penna me confondo e tremo,

Disemola, compare²⁴¹, tra de nu.

Questi i marita assae, no se burlemo²⁴².

Caro, el mio caro ben²⁴³, disèlo vu,

Se per lodar sta sorte de Fameggie

Ghe vorave sie mesi, e ancora più.

Xe fenio el tempo delle maraveggie²⁴⁴.

Una volta podeva in quattro dì

Far tante cosse da inarcar le ceggie²⁴⁵.

Adesso, amigo, no la xe cusì.

Semo debotto della botta al fondo,

E ghe penso e sfadigo ancora pi²⁴⁶,

E per questo me perdo e me confondo,

Sentindo dei Benzoni le memorie

Cusì famose e strepitose al mondo.

M’arrecordo aver letto nell’istorie

Che, de Crema signori e de Milan,

I ha avudo in Lombardia guerre e vittorie.

E in tempo ai nostri zorni assae lontan,

Sta FAMEGGIA s’ha unito per onor

Al supremo Conseggio venezian;

Dove l’ha sempre conservà el valor

Dei so primi parenti, e in terra, e in mar,

Omeni produsendo de gran cuor.

Tra i quali ho sentio tanto a decantar

Zorzi Benzon, nel secolo passà,

Che s’ha visto in armada a comandar;

 Che nave, che galere ha governà,

Del regno de Morea Proveditor,

       Capitan de Vicenza e podestà.

 E dei Memi savè quanto splendor

A sto Paese derivar s’ha visto,

  Pieni de gloria e de paterno amor.

 Sior Francesco Pitteri, no resisto

Al numero dei Dosi e Senatori;

  Le mie forze conosso, e me ratristo.

 Sento che me disè: Se dei maggiori

No gh’avè tempo de lodar i vanti,

  Ai novizzi pensè, cantè de lori.

 Mo no vedeu, che a metterme davanti

Un novizzo e una sposa de sta sorte,

 Xe un dir: férmete là, no andar avanti?

 Cosa voleu che diga de un consorte

 Pien de tante virtù, de glorie tante,

 D’animo grando generoso e forte?

 E d’una sposa dell’onesto amante

 Savia, bella, gentil, coss’oi da dir

 Mi, povero gramazzo, in tun istante?

 Bisogneria, per farme comparir,

 Che gh’avesse del tempo in abbondanza,

 Ma appena ho principia, s’ha da finir.

 Amigo, lo vedè, no gh’è speranza.

 Andè dal Cavalier, per carità,

 E per mi domandeghe perdonanza.

 Vu no me volé dir chi v’ha manda;

 Ma se el xe quello che me dise el cuor,

 So che el xe un Cavalier pien de bontà²⁴⁷.

 Diseghe, in nome d’un so servitor,

 Che conoscendo de non esser bon,

 Resto pien de vergogna e de rossor.

 E quel che no faria per sto patron

 (Se el xe quel che m’immagino ch’el sia),

 No faria per nissun, da quel che son²⁴⁸.

 Sior Francesco Pitteri xe andà via,

 Mezo contento e mezo desgustà,

 Promettendo de far la parte mia.

 Spero che quel che ho ditto el ghe dirà;

 Ma per bona memoria in un fogiazzo²⁴⁹

 Tutto quel che ho resposo, ho registrà.

 Voggio poder mostrar, mi poverazzo²⁵⁰,

 Che no xe stà per sparagnar fadiga;

 Che quando posso, el mio dover lo fazzo.

 E voggio che se sappia, e che se diga,

 Per sti Sposi novelli el mio rispetto.

 Prego Dio che i consola e benediga

 In chiesa, in casa, e finalmente in letto.