Filastrocche

Cara mama

Cara mama, mama bela,

ti te sì par mi na stéla,

che, dal beato Paradiso,

la me manda on to soriso.

Mi, vardando el to volto,

de luse tuto avolto,

co i angioli e i santi

ve vedo tuti festejanti.

A mi pensàndote toseta,

scapa calche lagrimeta,

e, desso ca só vecioto,

a me s-ciopa el sangioto.

Mi vedo che ti te ridi,

lassù ne i felissi lidi

e che senpre te me vardi

co i to grassiosi sguardi.

Sito sole o sito luna,

de le stéle ti sì la Una,

par mi ti te sì el conplemento

de l’intiero firmamento.

Oci neri e caveiji mori,

ti, de tuti i me amori,

ti te sì la reginela,

la regina, la pi bela.

Passa el tenpo par mi e par ti,

e chissà mai se on bel dì

vegnarò a catarte

par podere abrassarte.

Sarà festa, festa granda,

sonarà anca la banda

e, i angioleti in coro,

i ne farà da decoro.

Mi spero che ’l Signor,

de tuti el Salvator,

el me fassa fortunà

meténdome a ti tacà.

Spero tanto che la Madona,

fasendo da Patrona,

la fassa che sta speransa

la deventi na esultansa.

Ti spètame, ché mi vegno

nel to celeste regno

e, sperando in sto avento,

voja Iddio farme contento.

Roma, gennaio 04