Pierin

Pierin el gera on bel toseto,

anca tanto gran furbeto,

col so ténaro soriseto

mai el faséa on dispeto.

Se na cossa el spasemava

senpre lu el se la ciapava,

parché el la dimandava

come creansa comandava.

Cara mamina,

me feto le frìtole co la merisina?

Caro popà,

me crùnpito el sùcaro filà?

Cara sorela,

me ramìndito sta flanela?

Caro fradelo,

me inprìstito el to onbrelo?

Cara zia Teresa,

me deto na saresa?

Caro zio Toni,

me crùnpito du bonboni?

Cara siora Pina, ti te sì na dòna bela,

me regàlito na caramela?

Caro sior Bepi, ti te sì on omo brao,

me ragàlito na feta de bussolao?

Cara siora Rosina,

me regàlela on scheeto pa’ la me musina?

Caro sior Tonin,

me regàlelo on franco pa ’l me tacuin?

Cara siora ela,

me dala on recin de ua spinela?

Caro sior elo,

me dalo de mandolato, on tochetelo?

Care siore ele,

me regaléo na sbrancà de nosele?

Cari siori luri,

me regaléo du piri mauri?

Co sto bel dimandar del Pierin,

fato co sesto e col so bel visin,

ogni so desiderio e pensierin,

el riussìa a portar nel so magazin.

Roma, gennaio 04.