El me oseleto

In na gabia picinina

tuta bela piturà,

a go messo na matina

on oseleto ben sarà.

L’oseleto el sigava

tuto quanto desperà

e co l’ale el volava

na volta qua, na volta là.

Dopo èssarse stracà

de sto longo fadigar,

molo molo e rassegnà

el se ferma pa’ sponsar.

Pensa e piansi,

piansi e pensa,

dopo fati i so pransi

el vardava la cardensa.

Drento il lustro bevarin

metéo l’aqua tuti dì

pomo, pero e spanavin

gera prunti pa’ mesodì.

Dopo on par de sitimane,

quando che ’l se gera bituà,

no ’l fasèa pi tante lagne

ma ’l vivéa co fà on passià.

Mi a le volte ghe parlavo,

ghe voléo insegnar parlar,

ma finché mi lo vardavo

lu el se metéa a fis-ciar.

Mi parlavo, lu fis-ciava

e, passà de ani on paro,

bituà a come che la nava,

la ‘gabia’ xe deventà ‘gnaro’.

Roma, gennaio 04.