El me cavreto

Mi a go on bel cavreto

che ’l xe tanto discoleto,

nar pa’ fossi, buschi e pra

xe la so felissità.

Elo el ga n’altra passion,

xe de far gran confusion,

e se ’l scapa zó pa ’l brolo

lu el fà el scavessacolo.

Se el magna foje de acassia,

zamè par che el sin sassia

e, se el magna erba spagna,

xe par lu vìnsare na cucagna.

Se ghe dò del bon strafojo

lu el dise: ancor ghin vojo,

se invesse el xe bon fen

anca quelo ghe va ben.

El bon sorgo sinquantin

xe par elo pan e vin,

e se ’l cata na panoceta

la va zó ne la so panseta.

Elo el smena la coeta,

la so suca e la barbeta,

e co i gran so ocioni

el me manda saludoni.

Mi no xe ca lo castigo

se a on palo a lo ligo

co na cordela ben ligà

quando ca vago al marcà.

Có se fà sera e no ’l me vede

lu che tanta el ga in me fede

co fà on picinin bebè

el me ciama co i so... bèe bèe bèe.

Roma, gennaio 04.