La me pecorela

Mi a go na pecorela,

me la tegno pa’ sorela

on fià tonta, in verità,

ma la xe la crua realtà.

Ela la xe tanto bona

mai la fà da parona,

ela senpre me capisse

ela senpre me ubidisse.

Sa ghe digo: nemo là

ela pronta la ghe stà

sa ghe digo: vien chì

ela suito dise: si.

Ela xe de boca bona

niuna erba l’abandona,

e co le foje de acassia

la se sente propio sassia.

Paja, fen, erba spagna

bon strafojo ela se magna,

ma i magnari preferìi

xe chei ciapà da i me dìi.

Ela xe na gran magnona

on fiatin pur sporcaciona,

có ghe vien le so robete

la le mola in petolete.

No gh’inporta indo’ la stà

e, se la stesse pur al marcà,

ela la le semenarìa

nando drio la so via.

Cara la me piegoreta,

no la xe na poareta,

ma invesse na gran siora

che el me cor la inamora.

Roma, gennaio 04.