Bepin e Menegheto

Bepin el gera on bel putin

oci, rece e nasin,

so fradelo Menegheto,

anca lu gera perfeto.

I paréa do giosse d’aqua,

come i uvi de la Pasqua

e pi che èssare fradei

i paréa èssar du gemei.

Có la gente l’incrontrava

gera chi che malignava,

ma gera anca chi gioia

pa’ sta copieta ben inbastìa.

Le tosete bele e brae

le restava inmagae

e co i oci bei verti

le faséa i so comenti.

Tuta la gente de la contrà,

come la fusse inbanbolà

la diséa in ben o in mal

de sta copieta ecessional.

Ma i fradei, in barba a tuti,

i faséa i sordomuti

có la gente la parlava

come a ognun pi che nava.

Ma fra tanti ciacoluni

ghera pur de i sapientuni,

che in ben i estimava

sta copieta bela e brava.

I paréa santi de cesa

e, sensa far luri ofesa,

gera pur vardarli belo

có i stava sóto l’onbrelo.

Par so pare, sior Gianfranco

luri i gera el so vanto

e par so mare, sior Maria

i gera i tusiti pi bei che ghe sia.

Roma, gennaio 04