Pinochio

Pinochieto, Pinochieto,

ti no te vui mai studire,

ti te sì on discoleto

e te vui senpre zugare.

Se el brao to papà,

che de ben el te ne vol tanto,

el dimanda se te ghè studià

la verità no xe el to vanto.

Te ghè dito na busia,

el naso se ga slungà,

come la xe la sia,

de na granda quantità.

La volpe e el gato

co le so lusinghe bele

i te ga fato mato

co le furbete so favele.

Pur le rece da somarelo

Lucignolo scoltando,

discoleto anca elo,

te ghè vudo no studiando.

Ti te sè che la fatina,

dopo del to inbrojeto,

la ga fato la carina

sistemando el to naseto.

Ma ela senpre no ghè sarà

par podere far normale,

se el to naso se slongarà

se ti te cunti altre bale.

On consilio mi te dago

e ti serca de scoltare,

no star pi nar drio al mago,

ma métete a ben studiare.

Quando alfin te sarè grando

te farà piassere tanto,

se te narè vanti mi scoltando

e de to opà te sarè el vanto.

Roma, gennaio 04