El me cagneto

Mi gavéa on bel cagneto,

elo gera on brao bracheto,

propio ben mi ghe voléa

e tante caresse ghe faséa.

Lu el gera on cagnolin

tanto tanto birichin

e, có mi svoltava l’ocio,

lu el faséa on pastrocio.

Có a spasso lo menava

el savéa indo’ ca nava

e, al moraro pi vissin,

el mostrava el so pissin.

“Fioldoncan e sporcacion

te starissi ben in preson,

serca de catarte on cesso

ca te fasso nar in processo.

Dighe pure al to paron

che ’l te insegni l’educassion

e, se te vui ca no te smaca,

no lassarme la to caca”.

Mi ca gero on paron bon

mai doprà go el baston,

ma se no el me scoltava

do papine el rancurava.

Se calcun lo caressava

la sucheta lu sbassava,

se on fis-cio un ghe faséa

lu arente el ghe coréa.

Pan biscoto el rosegava

e i ossi el sgramolava,

ma se ’l gera bon cician

el lo voléa da le me man.

Có la sera la rivava

ne la cucia el s’intanava,

có rivava el matin

el vegnéa darme on basin.

Roma, gennaio 04