Porta Calavena e via Calavena

(Precisassion doverosa. Sta storiela, la xe òpara de puro estro, sensa gnanca on puntelo de carte, de fati, de robe documentà. El me scopo el xe chelo de demonstrare, come che mejo a só bon, la gran richessa e la fassilità de la dialètica (el ciacolar) del ‘dialeto visentin’. Mi, ca ghe credo ne la vita de l’al de là, me piase pensar che, se santa Agata la me stà scoltando, la se fassa do bele risade!).

Care e cari castelesi e arsignanesi, desso ve vojo contar la vèra storia del miràcolo de santa Agata e del parché, la porta Calavena, la se ciama CALAVENA e la via Calavena, la se ciama CALAVENA. Mi dezà sò che, calchedun, no ’l retegnarà i fati ca contarò fati vèri, ma mi insisto e persisto sostegnendo che la storia la xe vèra, conpagno che, da che mondo xe mondo, la piova, có piove, la va in zó e no in sù. Dovì saver, cari mii, che na volta, da tanto, ma da tanto lontan, xe rivà na frota de slandruni, che i se ga acanpà propio ne la piana de la Val del Cianpo, in on posto che ’l stà poco vanti de Arzegnan e pena de de sóto del castelo de Castelo. Beh, sta ghenga de gente raminga, che la se gera trata in baterìa dàndose a la lingéra e che nissun abitante de la Val del Cianpo de lora el se gavarìa fato scrùpolo de soranominarla ‘gente sassina, gente delinquente, gente desgrassià, gente sensa Dio’, ve stavo disendo, sta ghenga de baruni la xe restà co tanto de oci vedendo el bel castelo de Castelo. El capo de sti degrassià el gera on gran smargnifo e elo, in pressa, el ga ordinà l’adunata de tuti i so aruolà a i quai, inmagà ma sveji, el ghe ga fato, parola pi parola manco, sto discorso programàtico: ‘I peoci fà peoci, i schei fà schei. Par far le robe bele, ghe vole na mota de schei e se chei de lì drento i se ga tirà sù sto bel castelo, vol dire che i ga le scarsele sgionfe de palanche. Orpo la Bepa, par desso se femo on bel acanpamento, magnemo e bevemo a sbafo e chei papemole là, sarà drento là, li ciaparemo o par sotobanco o co la forsa o par fame o par sé. Na volta ca gavaremo trato zó on tòco de i murajuni o butà zó i portuni, naremo a torse i so schei. Vurì mia, granfati, ca sémo vegnù chì par nar via co le scarsele vode’! Cussì, in chei giorni de chel’ano lì, par i pori assedià de de drento el castelo, xe scuminsià on ano de strussie, on ano bruto, on ano moro, on ano de fame cagna. I invasori, acanpà de de fora del castelo, paréa che i gavesse catà la cucagna e i nava de paese in paese, de crosà in crosà, de casale in casale, de maso in maso e i rivava, parfin, a i barcoti pi foraman. Dapartuto i sercava e i catava bobana de magnari: bóte e visui pieni de vin moro e de vin bianco, botesele de sgnapa, forme de formajo e tante altre prelibatesse. Tacà via a i travi de i solari de le cusine e de le càneve, i catava na mota de stanghe de saladi, parsuti, sopresse, museti, cincionele, vissighe de struto, quarti de lardo. Ne le stale i catava cavai, mussi, tori, bo, vache, vedei, ancor ligà a le so gripie. Ne le teze i catava fen bon, a volontà e, ne le legnare e ne i fassinari, i se toléa tute le stèle de moraro e de ròvare co le fassine mejo, par farse fughi boni. La legna che la valéa de manco, par dispeto, i la brusava sul posto. Sti scalmanà, squasi par zugo, i tirava el colo a le galine, a i gai, a i capuni, a i piti, a le faraone e, parfin, a le galinele chechete. No contenti, i ciapava par el copin e i tirava fora i coneji da i so gabioti, i porsei da i so staloti, i robava le piegore e le cavre sperse par i canpi e, casa par casa, i se ciapava i magnari mejo. Se podarìa dir che, chei de de fora, i gavéa catà el paradiso terestre e che, chei de de drento, i gera intrà nel purgatorio. Tuti i dì vegnéa sù, da de de sóto de i murajuni, serti parfumini de rosti fati col osmarin e le foje de sant’Antonio e se sentìa i canti de i inbriaghi smarsi, che i cantava a tuta garganta. I pori afamà asserajà, par la desperassion, i se metéa la bonbasa ne le busete del naso e de le rece, ma no i podéa zitire la fame che la ghe rosegava le buele, da de drento de la pansa. Passà pi de du misi de sto assedio desgrassià, i pori internà i se gera fati sifolini e i gera ridoti, aromai, a i stremi e chei de de fora, de contra, i se gera fati grassi e lustri, pi de i porsei slevà ne i staloti. L’ansiprete e i capelani, puariti, i diséa messe in continuassion e i invitava tuti i fedei a dir orassion, co tuta la fede che i gavéa. Se faséa novene, se ressitava tarseti, se gavéa adobà l’altare majore come sa fusse stà el tenpo de le quarant’ore, se faséa on trìduo drio l’altro e se se gera ricursi, parfin, a le Messe Gregoriane. Na matina, el sior conte, l’ansiprete e i òmeni mejo, che i se catava de de drento el castelo, i se ga raunà par dicidere el da farse. Se ga fato na mota de rajonamenti, ognun ga dito la sua e la conclusion, carta in man, la gera che, i pori assedià, pur fasendo tute le colomie de sto mondo e pur restrenzendo le rassion dezà tanto rassionà, no restava magnari che par sol tre sitimane. Le solussion le gera: o morir tuti de fame o vèrzare i portuni a i invasuri o zugar d’astussia co i assedianti. On tale, restà scognossùo, el ga proposto na furbarìa e, se sta trama la gavesse funsionà, la gavarìa salvà i sfortunà assedià. Desso, permitìme de farve el punto del punto de le risserve de i magnari rancurà de de drento de i magazini del castelo e, sta grassia de Dio, tute ste bone robe, le gera vardà, a vista, da le guardie pi afidà. De de drento de i armari o de de drento de le stanse pi secure, tuto sarà a ciave co dupio scroco, restava: sinquanta sachi de pan biscoto, quarantanove sachi de vena, trentasinque suche mate pa’ i porsei e disdoto suche bone pa’ i cristinai. Se contava, anca, trenta file de vinti cioncionele paruna a le quali nava zontà vintidó file de na dosena de lugàneghe paruna e, tuti sti nagnari, i gera ben picà via a le so stanghe. Ghe gera, anca, vintisinque seste de patate co tre seste de patate cornete, vintidù sachi de nose, vinti sachi de nosele, disdoto zerle de castagne seche, sèdese sachi de sèmola, quìndese reste de séole a le quali nava zonta tre reste picinine de scarlogne, trèdese sachi de sorgo, dódese reste curte de teste de ajo de le quali, metà el gera chelo rosso e metà chelo bianco. Gera ben conservà, anca, óndese sachi de formento, diese sestei de stracaganasse, nove sachi de farina zala, oto sachiti de caròbole, sete sachiti de farina bianca, sié quartaroi de fighi sichi, sinque dradi pìculi de ua passa, quatro sachiti de fasóle, tri sachiti de fasui russi, do sporte de bisi, on parsuto, na sopressa, mesa reléta da ua co ciari graspi co i grani, aromai, pi che pasìi. La roba pi bruta, parò, la gera che le vasche de la racolta de le aque piovane, le nava secàndose e scominsiava a canpigolare i primi bai. Parché el stratagema sugerìo el funsionasse a puntin, el dovéa èssare fato in pi fasi. La prima fase la gera che tuti i dovéa far on gran bacan, la seconda fase la gera che tuti i dovéa fermarse e zitirse, la tersa fase la gera che Toni, el tenore pi mejo del coro de Castelo, el dovéa repètere pi volte, cantando a tuta garganta: CA..LA... LA... VE..NA... . La quarta fase la gera che, co de le catapulte apòsite, se gavarìa trato de de sóra e al de là de i murajuni del castelo, na mota de sventolà de vena s-ceta. Sarìa seguìa la quinta fase, chela che, senpre co le catapulte speciali, sarìa stà sgiaraventà solo grani de formento e grani de sorgo. La sesta fase la gera chela che se gavarìa butà zó na mota de sbailà de sèmola e sfiondà de fasóle, de fasui e de bisi. La sètima fase, la pi delicà, la gera chela de quando che se gavarìa doprà i tri supiauri, supiando farina bianca smissià a sénare, sémola smissià a segaura e farina zala pura. Le ciope, le ciopete, le mantovane e le banane biscotà, le patate, le nose, le nosele, le castagne, le stracaganasse, le caròbole, le suche bone e le suche mate, le séole, le teste de ajo, l’ua passa, invesse, gera robe che le sarìa stà trate a man e a i tenpi oportuni. I assedià i sperava che i assedianti, dopo de gaver constatà, co i so oci e co le so man, che da de drento del castelo i trava via vena pura, formento selto, sorgo bon, fresca farina bianca, pressiosa farina zala, sèmola de prima qualità, fasui e fasóle, nose, nosele, caròbole, pan biscotà, castagne, stracaganasse, patate, bisi e altri boni magnari, ve stavo disendo, i pori assedià i sperava che i assedianti i la bevesse, credendo che luri, i assedià, i stava in bondanza granda, i gavéa vìvari par ani e ani, i podéa resìstare in eterno e, in quanto a molare, luri no i la gavarìa mai molà. Pur gavéndole studià tute, parò, i assedià i gavéa fifìo che de le robe le nasse storte e, lora, da bravi e boni cristiani, i ga deciso che le mòneghe le stesse in cesa co i tusiti de l’ùltima crèsema e i tusiti de la prima comunion, col cònpito che, tuti insime e a alta vosse, i racomandasse i assedià a santa Agata. Infati, tuti i confidava che sta portentosa santa, ciapà da conpassion, la se gavarìa comossa e la li gavarìa esaudìi. Beh, desso riciapo el cao de le assion pràtiche, studià par poder realizar la quarta fase. I fabri, fata comunela co i arcieri, i ga construìo de le catapulte speciali e i arcieri, par ciapar la mira justa, i faséa le prove de note, trando giara grossa. I arcieri, infati, i voléa cognòssare el sentro del sentro de l’acanpamento e, da quante sarache, dàndare, maledission e sighi i sentìa vegner sù dal de là de i murajuni, i intuiva se i gavéa ingiovinà o falà i posti boni. Na volta sentrà le diression juste, i fissava le inclinassion de le catapulte, blocando le verghe de assale e i àstici. Par poder realizar la sètima fase, i bandari e i stagnari, anca luri tuti d’acordo, i ga construìo tri supiauri grandi che mai. Beh, rivà a sto punto, permetìme ca me cava on magon dal core fasèndove na confidensa pi che ìntima, che la me struca el core da na mota de tenpo e, anca parché, sicome che xe passà i sinquanta ani de òbligo de silensio assoluto che i xe comandà dal Stato, sarìa come dir, de tegner vincolà i secreti de i piani militari e de le armi spessiali e, ancor de pi, parché no ris-cio de finir incadenà drento i trimindi piunbi al de là del ponte de i sospiri, ve stavo disendo, ve vojo svelare el secreto pi secreto de tuti i secreti del secreto arsenale de Venessia e ve conto de l’arma spetacolare, dita ‘supiaro’, inventà da i bandari, da i stagnari e da altre persone ben studià. Come dezà dito, sti chì i gavéa alestìo tri supiauri fati de banda e, sti tri angagni, i somejava a de le gorne, conpagno de chele fate co la lamiera zincà. I supiauri i gera bei tundi e sensa macaure. Le parti de de drio de i supioti, le gera serà co na lamela de rame saldà col stagno e le parti in punta, invesse, le gera verte ma schissà, a mo’ de na sfesa. Intervalà, al de qua e al de là de ciascheduna de ste sgorne, gera fissà séte canei de lamierin, quatro da na parte e tri da chel’altra. Sta trovada ben pensà, la gera stà studià parché i vintiun supiaturi, quando che i sarìa nà a supiare nel canolin a ciaschedun de luri assegnà, no i se intrabucasse o i se pestasse i cali de i pié. El fià de i quarantadù palmuni de i vintiun supiaturi, el dovéa nar fora da le tre sfrese, come se fusse tri palmoni che supiava, par capirse, on palmon par supiaoro. Tre done presselte, le gavarìa dovudo métare cuciarà de farina bianca smissià a senare, sculierà de sémola smissià a segaura e, a pugneti ben misurà, chel tanto che gera restà de farina zala. Ste tre done corajose, le gavéa el cònpito de métare, co maestrìa e a muceti ben fati, i magnari dessora del pian, fra merlo e merlo, propio darente la svesa de i supiauri. De de dopo de sta operassion, i vintiun supiaturi i gavarìa dovudo inpienarse i palmuni de aria e, al comando del caposcuadra, divisi in tre squadre de sete supiaturi paruna, ma tuti supiando ne l’istesso momento, supiare, xe ciaro, ciaschedun ne la canela a elo assegnà. I mareleti de farina bianca co la sènare, chei de sémola co la segaura e chei de farina zala, ciapando gran sbrufade, i sarìa svoltolà in suso e in vanti, in qua e in là, sparpajàndose par ben. Desso ve conto de come che dovéa nar l’operassion de i supiaturi. Bisognava respetar tre parole ciave e ste tre parole le gera: FARINA - RESPIRARE - On do tre, SUPIARE e i supiaturi, a la tersa parola ciave SUPIARE, i gavarìa dovudo supiare. Suito suito e de novo, el caposquadra el gavarìa replicà: FARINA – RESPIRAE – On do tre, SUPIARE e via cussì, fin l’ùltima s-ciantinela che restava de chel ben de Dio. Tuta sta conplicà operassion de salvamento, che la se gavarìa dovudo fare al momento pi oportuno, la sarìa stà regolà dal sior conte che, dal terassin del pèrgolo de la toreta del castelo, el gavarìa dà i segnai sventolando bandiere de coluri difarenti. Beh, na matina, toléndosela de sóto ganba, on serto nanarelo dito Pipo, el se ga fato capofila e, a cavalo de on caval, el xe partìo co la lancia in resta cantarelando e fis-ciando: ‘desso rivemo... - desso ve sgnaremo... - desso ve copemo... e altri diti de sta solfa. Tuti chei che ghe vegnéa drio, i ghe faséa da coro, repetendo el finale de la tiritera ‘...emo emo - ...emo emo’... . Insoma, par fàrvela capir justa e ciara, la mùsica la gera sta chì. El berliche de Pipo: ‘desso rivemooo’ / el coro ...emo emooo; chel porsel de Pipo: ‘desso ve sgnaremooo’ / ...emo emooo; ‘desso ve copemooo’ / ...emo emooo e via co altri tremindi rusi de sta sorta, che i faséa incaponar la pele a i pori assedià. Sa no ve lo go dito, ve lo digo desso e dovì saver che, pena che chel maraman de Pipo co la so ghenga i se gavéa acanpà, la pora gente de la Restena, de i Tri capitei, de San Matìo, de la Calpéa, del Costo, de le Tese, de la Madoneta, de San Bortolo, de San Zen e via via, insoma, de tute le popolassion de la val del Cianpo, tute, poarete, le gera corse via, de tutta pressa, inbusàndose ne le vali o scanpando sù par i munti. La gente pi tacà al castelo, invesse, portàndose drio quanti pi magnari la podéa, la gavéa sercà scanpo de de drento de le mura. Fata sta precisassion, chela matina de chel giorno lì, quando che chel fioldoncan de on càncaro de Pipo el se gera deciso de farla finìa, beh, chel giorno lì, par i pori assedià gera scocà el momento justo par métare in pràtica el piano de difesa-ataco, cussì ben da luri studià. Come che le sentinele de guardia le ga scominsià a sonar le tronbe par dar l’alarme, el sior conte el xe corso, de tuta pressa, sul posólo de la toreta, pronto a sventolar le bandiere. I arcieri, anca luri i gera cursi a le catapulte, prunti a far piòvare na piova de grani de vena s-ceta e, de dopo, grani de formento e grani de sorgo. I aiutanti de i arcieri, come che i sachi de la vena i se gavarìa svodà, i sarìa stà prunti a sligare le boche de i sachi inpienà de formento o de sorgo e, co na sèssola, i gavarìa incolmà le catapulte. Anca i ventiun supiaturi i gera cursi tacà a i tri supiauri e gera rivà, anca, le tre done presselte. In on bàtar de ocio, tuti: el sior conte, l’ansiprete, i capelani, le mòneghe co i tusiti, i òmeni, le done, i veci, i zòvani, i malà, i gera prunti par l’assion a ciaschedun assegnà. El canpanaro, pèso de on mato, el sbatociava a morto, el sagrestan el tirava la cadenela de la canpanela de la sagrestia, i mòcoleti i scorlava i canpanei da messa conpreso el canpanelo de le messe soleni, chelo fato co quatro canpanei e la perpetua la sgnacava i du coerci de le do pignate pi grosse, l’un contra l’atro. L’organaro el sonava l’òrgano, le done le sbatava i coerci e le pignate, i boce i coréa par la piassa tiràndose drio e strapegàndo na mota de bussoloti de banda, i tusiti che gavéa le ràcole i le faséa ruare, i veci e le vece i sgnacava le sgàlmare o i sòcoli dosso le porte e i portuni, i infermi, da so parte, i sbatéa, co i cuciari o i pieruni, i piati e le scudele de luminio o de fero smaltà e la banda comunale, sul sacrato de la cesa, la sonava a pi no se pol. Par scurtarla, tuti i concoréa a far na cagnara e on bacan de l’altro mondo. Come che Pipo el xe rivà de de sóto de i murajuni del castelo, sicome che el se credéa d’èssar el paron del mondo, col brasso ben alto el faséa ruar par aria on menaroto fisso in pugno e el ga scuminsià a sbraitare. Elo, infati, el pretendéa che i assedià i ghe alsasse el ponte levatoio e che i ghe verzesse el porton del castelo. El cao de sta filìpica el scuminsiava cussì. “O valenti me soldà ca gavì vudo na fede incrolàbile in mi e ca sì vignù da la vostra cara tera natale fin a sti screnpani spersi nel mondo, ve lo confesso ciaro e tondo: mi credéa che chei de de drento de là, al massimo de de dopo de sinque giorni i gavarìa alzà la bandiera bianca, ma no la xe nà cussì. Lora, ripensàndoghe, ve digo che xe tenpo fruà invanamente sa rimandemo ancor de de pi tenpo l’assalto al castelo e, ve lo confermo, xe rivà l’ora ca demonstremo de che pasta ca sémo e de finirla de gratarse la melona e de tegner le man in man. Cari mii, qua bison passar a l’assion fasendo i polìtici sbisegnini, che i lavora no al scuro del  sotobosco, ma al ciaro del sole. Femo come che racomanda on vecio proverbio: ‘pugno de fero, in guanto de veludo’. Granfatti che noialtri no saremo boni de sgnarar fora quatro polde da la so peocinara? Vedarì che vanti che se fassa note, saremo tuti siuri!” La coa de la renga, invesse, chela rivolta da chel striosso de Pipo a i assedià, se le parole no le xe stà propio chele che mi ve disarò desso, la sostansa, parò, la gera sta chì. “Sentime ben, bruti testuni ca no sì altro, quel ca ve digo parché ve lo digo na volta par tute: sa no me verzì co le bone e a l’istante el porton, dopo ca lo gavarò trato zó co la forsa, ve brincarò par i calcagni, ve cavarò le bale de i oci, ve cavarò le onge de i pié e le onge de le man. A chei altri, che i càpitarà de de sóto de le me sgrinfe, ghe tajarò la pansa, ghe cavarò le buele e, chi che no more sóto i feri, lo farò a fetele!” De dopo, el Pipo risvoltà a i so associà: ‘Vulìo ca nemo a l’assalto o vulìo ca tornemo casa?” La risposta de i masnadieri assedianti, a sti programi de ataco-assalto, la xe stà: “Pipo, ti te sì el nostro capo; ti comanda, ché noialtri femo”. “Lora, nemo a l’assalto!” “Siii!” Sto ‘siii’, el xe stà interpretà da i pori assedià come ‘a l’ataco’ e, tuti, i se ga fato el segno de la crose e se ga insegnà, co contrissiom, parfin Bijo, che no el credéa in Dio, no el nava in cesa da vintisete ani e, quando che l’incrosava on prete, el svoltava la facia da chel’altra parte. No ghe credarì, ma, a sto punto preciso, par tuta risposta, dal dito al fato, da de de drento del castelo, se ga alzà on bacan ca no sò dirve, parché, come ca gera previsto da i assedià nel piano de difesa-ataco, el sior conte el gavéa dà el via a la prima fase, sventolando la bandiera rossa dando, cussì, l’inissio a la riscossa par la liberassion del castelo. Al segnale del via, tuti i se gera missi a far romori, pi che i podéa. Par dalbon, somejava che cascasse zó el sielo o che croasse zó el castelo co tuti i so murajuni e co tuti i so bastiuni! Dopo diese minuti de sto fracasso, che ’l gavarìa inmatonìo anca i surdi, sicome che el sior conte el gavéa dà el segnale de la seconda fase, sventolando la bandiera zala, tuti i ga fato muci. Passà tri minuti de silensio de simitero, el sior conte el ga sventolà la bandiera mora e, in chela tersa fase lì, se sentìa sol la potente vosse del tenore Toni   CA..LA... LA.. VE..NA... – CA..LA... LA.. VE..NA... .  I assedianti, che i gera tauschi e no i capiva n’aca straca de chela nostra lengua de lora là, i ga intendù sto dito come CALAVENA e, co i musi da frescuni, i paciolava in continuassion CALAVENA – CALAVENA. Tuti, de de drento el castelo, i trategnéa el fià e, sicome che el silensio el se gera fato assoluto, se  sentìa sol la vosse de Toni, che la repetéa: CA..LA... LA.. VE..NA... e, parò, se sentìa, anca, el pispolìo de l’eco de chei de de fora, che i sejtava a paciolare CALAVENA - CALAVENA - CALAVENA. Intanto, gera passà i du minuti assegnà a Toni e, el sior conte, el gavéa dà el via a la quarta fase, sventolando la bandiera azura. Màriassànta, màriavèrgine e màriavìrgola, co l’inissio de sta quarta fase del piano de difesa-ataco, el sfaresson de Pipo, invesse che védarse alsare el ponte e vérzare el porton, el ga visto e sentìo trarse dosso spissaroti de vena s-ceta, come se, a sece roverse, stesse piovendo vena de prima qualità. A sta reassion stranba de i assedià, chel pelandron de Pipo el xe restà inpanpalugà, conpagno che xe restà inmacacà tuti i altri assedianti. Chel sbiseghin de chel tàngaro de Pipo el nava repedéndose ‘ma come zela sta storia ca no capisso’ el se ga dito: “Sacramen del candalosti, mi sperava de ciapar sti chì par fame e par sé, ma xe luri che i me fà morir de fame e de rabie. Varda on po’ ti, luri i ga tanti de chei magnari, che i pol trarli a i pai, a le arne e a i sisi. In sto posto chì de la malora, tute le robe le me va roverse e sarà mejo ca vaga da n’altra parte, par catar fortuna pi a la portà de man!” Par dìrvela ciara e tonda e par tirar na conclusion, el smargiasson de Pipo no ’l ga fato la parte de Giovani de le Bande Nere, ma el ga fato la figura del parpagnaco! Ancor i assedianti no i gavéa verto boca ma, dato che el sior conte el gavéa sventolà la bandiera bianca, dando l’inissio a la quinta fase, chei de de sóto i se ga visto sgiaraventarse dosso sbrancà de grani de formento smissià a grani de sorgo. El bulo de Pipo el stava sercando de spiegarse sto bàgolo inaspetà e el se strucava el sarvelo par darse na reson ma el sior conte no ’l se dava rechie e, fagando co regolarità matemàtica el piano de difesa-ataco, el gavéa verto la bandiera maron dando, cussì, el via a la sesta fase. Puariti chei de de fora de là parché, a brusacamisa, i se ga visto trar sóra de le so melone, sbailà de stracaganase, de nose, de nosele, de caròbole, de fasóle, de fasui, sfiondà de bisi, sbrancà de grani de ua passa e, anca, scaregà de rosegoti de pan, ciope, ciopete, banane, mantovane e, par finir, ondà de patate, conprese le patate cornete e na mota de séole e na fraca de teste de ajo. El sior conte no ’l perdéa tenpo e, infati, el gavéa verto la sétima bandiera, chela verde. Gera el segnale che, le tre done presselte, le dovéa posare i magnari arente le sfese de i tri supioti e che i vintiun supiaturi i dovéa pareciarse par supiare. Al poro Pipo inbanbolà, ghe paréa de nar for da i sintimenti e, intontonìo pi che mai, el tentava, puareto, de dar òrdini sul da farse, ma, trichete tròchete, no ’l ga possudo vérzare boca parché, essendo inissià la sétima fase, on paston inpotacià de sèmola, de farina bianca, de farina zala (e noialtri savemo ben smissià co che coss’altro), el ghe gavéa inpetolà i lavri, inpastrocià le seje, incolà le palpiere, sarà i oci, stropà le busete de la nasopia e de le rece. In tuto sto gran mismas, santa Agata la ga visto el farvore col qual le mòneghe, le novissie, i tosateli, le tosatele, con le man ben congiunte e co le làgreme a i oci, i la inovocava, i la pregava, i la suplicava par gaver la so intercession e, tocà: “Ma varda ti che ben che me vole sta brava gente e quanto che i spera in mi!” Ela, puareta, la se ga sentìo come strucarse el core e, comossa: “Eh si, bison propio ca juti sti puariti martorià”! La Santa la ga alsà la so man misericordiosa e, suito, come par incanto, ga scominsià a tirar on bel venteselo, che el ga slalototà par ben la farina bianca, la farina zala, la sèmola, la sènare, la segaura e tuto chelo che stava par aria. Visto sto fato miracoloso, i assedià i ga intuìo che santa Agata la ghe gera vegnù in socorso e, rinforsà de ànemo, i ga vudo la furbarìa de mandar i tusiti e le done a tor da i leti le forete e i stramassi inpienà co le pene de i capuni, de le arne e de le oche e, na volta portà dessora i spalti de i toriuni, i ga scusìo le intimele e desfà i stramassi, trando tuto quanto de de sóto, a sbrancà. Cussì, el vento no sol el parava torno tute le robe che stava supiando i vintiun supiaturi co i tri supiauri ma, in pi, santa Agata, fasendo far susineli, supieti e folà de vento, la ricipava la roba dezà par tera, riportàndola e risvoltàndola in alto, fasendo deventar el sielo squasi moro. Insoma, santa Agata la gera intervegù fasendo el gran miràcolo! El babèo de Pipo co tuti i conpari inpanpinà i gera inas-cià da ste pòlvari: i straunava, i sbossegava, i stava par stofegarse, paréa che i stesse trando fora l’ànema, i se spintonava, i se inganbarava, i sotenava come de i pori desgrassià, i se dava, urtàndose, de le tàngare da orbi e, pori luri, i scanpava chi de qua, chi de là e ghe gera chi che, par spostarse, el nava a gatomagnao. Puariti e sinpioti de pora gente, i somejava na strépola de cavre salbeghe che le saltelonava par salvarse da on grumo de grauni inferosìi che, gavèndole ciapà de mira, le le stava sbeconando e, sti sfortunà de foresti spuncià, no i savéa pi come vegnèrghene fora! A chele face porche là de chei crui assedianti là ghe paréa come de gavere man, déi, brassi, gunbi, coli, cope, lache, rece e musi levri de tavaruni, grossi come cioati. Cussita, par no far la parte del cagainbraghe, el Pipo co la facia da èbete e co i so cuchi de assedianti, visto che i assedià de magnari i ghe ne gavéa on stramaro cussì grando da poderli trar al vento e, par contra, elo, co i so drughi conpari, no i gavéa squasi pi gnente da magnare parché i gavéa spacà e brusà tuto, el ga sigà: ‘Se salvi chi po’. De  de dopo elo el ga pensà: ‘A só propio scarognà parché in sto posto chì, le robe le me va tute strote e, rivà a sto punto, el ga mandà tuto e tuti a ‘to sàntola in cariola’. Par darghe on tajo, in quatro e quatroto, elo e tuti i assedianti i ga girà i tachi e i xe nà de longo. Xe stà cussì, cari mii, che chei smargiassuni de sgrandessuni, che da scalmanà i gera salìi tuti boriusi le falde del monte del castelo de Castelo, i xe tornà indrìo co la suca sbassà, sensa pi canterelando e fis-cetando, co la coa in meso a le ganbe, in na rota granda che mai. I sepulti vivi, come che i ga savudo che chei sassini foresti i gavéa oltrepassà el Guà e, fintramente, luri, i pori assedià, i gera lìbari, i ga verto i portuni del castelo e, felissi e contenti, i ga respirà l’aria de la libertà. Par ricordo imperiturio de sto fato capità, mensonàndose de i stranboti de i assedianti, che i interpretava le parole cantà da Toni CA..LA... LA... VE..NA... in CALAVENA, i ga vossudo ciamar la porta ‘porta CALAVENA’ e, la via che la diparte da sta porta ‘via CALAVENA’. L’ansiprete de la Pieve de Santa Maria de Castelo, doprando el càmice, chelo tuto ricamà a crossè streto col ricamo che el rivava fin al zenocio, el cordon co i fiochi grossi, i guanti bianchi ricamà col filo de òro fin, el manìpolo novo de trinca, la stola longa, el piviale largo, la mitra alta e el pastorale grosso, co i capelani de Castelo e el prete de le Tese, i ga conselebrà on pontificale solenne che mai, conpagno che se fà a san Piero, in Vatican, co canti a pi vossi e brusando tuto l’incenso de la navesela, col turìbolo argentà. A conclusion de i ringrassiamenti, se ga cantà el Te Deum e se ga inpartìo la benedission del Santìssimo co l’ostensorio dorà. Conprovà la potente intercession de santa Agata, che la gavéa salva i assedià, i grassià, tuti conpagno che i fusse un solo, i ga vossudo no sol ringrassiarLa inpissàndoGhe suito on cero grando che mai, ma i Ghe ga fato on voto solene e imortale, che sarìa come dir, de mensonare sto fato ecessional, in ponpa magna e de farGhe, ano par ano, on pensierin de ringrassiamento, par tuti i ani in vanti. Da par mi, cari mii, ve digo che xe propio belo védare che sto voto, ancor a i nostri dì, el sinque de febraro de ogni ano, el xe respetà e, preti, mòneghi, mòneghe, confratèrnite, autorià, castelesi, arzignanesi, fedei e foresti, pregando e cantando i va, col caval de san Francesco, in solene procession, a catar santa Agata par onorarLa e ringrassiarLa ne la so cesa, a le Tese, e assòlvere, cussì, l’imperituro voto fato da i miracolà de chei tenpi veci là!