II

<CONTRATTO DI MATRIMONIO TRA LORENZO DE’ MEDICI,

DUCA D’URBINO, E MADDALENA DE LA TOUR D’AUVERGNE.>

[38r] Inter Reverendum in Christo patrem dominum Staphileum episcopum Sibinicensem, Sanctissimi domini nostri pape Leonis decimi nuncium, et magnificum Franciscum Victorium inclite cominunitatis Florentie oratorem, procuratores Illustrissimi domini Laurencii de Medicis ducis Urbini nepotis secundum carnem prefati Sanctissimi nostri Pape ex una, et Illustres ac potentes dominos Johannem d’Albret, dominum d’Orval, cambellanum ordinarium christianissimi Francorum Regis ac gubernatorem Campanie, et Arturum Gouffier, dominum de Boisy, magnum Francie magistrum et gubernatorem Delphinatus, milites Ordinis ac consiliarios predicti Christianissimi Francorum Regis, procuratores Illustrissime domine Magdalene de Bolonia ex altera partibus, fuerunt initi, tractati et conclusi articuli sequentes.

Et inprimis quod iam dicti Illustrissimi Laurentius de Medicis et Magdalena de Bolonia cumprimum contrahent matrimonium per verba de presenti vel per procuratores specialiter fundatos.

Item quod dicta Illustrissima domina Magdalena de Bolonia, que est sui iuris et suorum bonorum domina, constituet et donabit nomine dotis, pro dote et ob causam dotis, dicto suo futuro sponso omnia sua immobilia, cuiuscunque qualitatis existant et in quocunque loco sita sint.

Item et quia dicta bona sunt communia inter iam dictam Illustrissimam dominam Magdalenam et Illustrissimos ducem Albanie et consortem suam, quiquidem Albanie dux et sua consors asserunt, tam ratione consuetudinum patriarum in quibus dicta bona sita sunt quam testamenti bone memorie Illustrissimi quondam Johannis comitis Alvernie dictarum Illustrissimarum dominarum patris, aliqua praecipua in dictis bonis habere, idcirco, ne super divisione dictorum bonorum lis aut controversia oriatur inter iamdictas sorores et earum consortes, conventum fuit quod Christianissimus Rex erit (si placuerit Regie Maiestati sue) arbiter dictarum controversiarum.

Item sua bona mobilia tradentur iam dicto Illustrissimo Duci suo futuro sponso legaliter estimata et per inventarium, et matrimonio soluto illa restituentur [38v] predicte future sponse in eo statu in quo erant tempore traditionis aut dicta illorum estimatio si supervixerit, et, ea predecedente, liberis procreatis ex dicto matrimonio et, illis defficientibus, heredibus dicte domine Magdalene.

Item durante iam dicto matrimonio dictus dominus dux Urbini tenebitur facere expensas necessarias et utiles in bonis dotalibus jam dicte domine Magdalene.

Item cumprimum dictum matrimonium solvetur, dicta bona immobilia in dotem constituta revertentur dicte domine Magdalene, si supervixerit dicto suo futuro sponso, et si predecesserit, liberis suis ex dicto matrimonio procreatis si extant et, illis non existentibus, heredibus dicte domine Magdalene.

Item vestes, ornatus et jocalia que dicta domina Magdalena tempore soluti matrimonii apud se habebit spectabunt ad eam si supervixerit, et, ea predecedente, liberis dicti matrimonii si extant et, illis non existentibus, heredibus ipsius domine Magdalene.

Item Christianissimus Rex, ob devotionem filialem quam habet erga summum Pontificem et ob intimum amorem quo prosequitur dictum ducem Urbini necnon dilectissimam consanguineam suam Magdalenam Bononie et favore dicti matrimonii, donabit dictis coniugibus et eorum superviventi et liberis descendentibus ex dicto matrimonio decem mille libras turonenses redditus annui. Quibus omnibus defficientibus, predicte res donate revertentur ad dictum Christianissimum Regem et successores suos.

Item iamdictus dominus dux Urbini donabit predicte sue future sponse, si supervixerit, donatione propter nuptias, unum castrum aut palatium munitum utensilibus et aliis mobilibus necessariis secundum statum domine Magdalene unacum quatuor mille ducatis auri redditus annui cum omnimoda iurisdictione et imperio. Quod quidem castrum seu palatium cum predictis redditibus tradetur et liberabitur dicte domine Magdalene statim soluto matrimonio et illis gaudebit et utetur quamdiu supererit in humanis, post vero eius decessum revertetur liberis dicti matrimonii, si extant, et illis defficientibus, heredibus jam dicti domini ducis Urbini. [39r]

Item sollennisabuntur dicte future nuptie cumprimum com<m>ode fieri poterit et ante illarum sollennisationem iam dictus futurus sponsus donabit sue future sponse vestes nuptiales et jocalia arbitrio suo et secundum eius statum.

Datum die decima sexta mensis Januarii, anno Domini millesimo quinquagentesimo decimo septimo.