QUART AT

Ufissi coma al scond at.

Sena prima

'L Cap sessione Moton a son an sena c'a discoro.

'L CAP SESSION Possibil?

MOTON A j'è gnun dubi, cavajer.

'L CAP SESSION 'L Comendator, ch'j'eu sempre chërdú 'n om d'prinssipi cosí sever, i diria, 'n om verament com'il faut!

MOTON Eh! A smia che ij so prinssipi a j përmetto côle cose.

'L CAP SESSION A l'è lon c'a l'è scaudasse tant për monssú Travet... Adess ch'i m'n'arcordo!... Ier a j'è vnuje sí la fomna d'Travet, e a bsognava vëde come c'a l'ha ricëvula!

MOTON Vëdlo?

'L CAP SESSION Sí a l'uffissi peni!... A l'è, i diria, un scandol.

MOTON E jerseira a j'ero al teatro ansema.

'L CAP SESSION Oh! 'n'autra!

MOTON E monssú Travet a comensa a tensne.

'L CAP SESSION Ah! sí?

MOTON A parla già con una cert'aria...

'L CAP SESSION A m'piasria vëdlo.

MOTON A l'è tanto sfacià da quasi vantessne.

'L CAP SESSION I na dubito pa... Côla gent lí!

MOTON Ier matin a disia bele sí a mi e a Rusca... A peul ciameje s'a l'è nen vera... A disia: «a 'ndarà nen un pess ch'j'avreu da benedí 'l moment che 'l Comendator a l'ha butà ij pè ant mia cà».

'L CAP SESSION Che impudent!

MOTON E d'co alo pa avú l'insolenssa d'rifudé soa sotoscrission për la cros da presenteje a chiel, sor cavajer...

'L CAP SESSION Ah! A l'ha rifudà?

MOTON Sí sgnor.

'L CAP SESSION Per dissna! Lolí a l'è ciair... lolí a l'è 'n atto d'ostilità contra d'mi, suo superiore diretto, lolí a l'è... i diria... un sfideme... Oh! i la vëdrôma, i m'lasso nen manché d'ij dovuti riguardi da për parei, mi! Oh! no, no... I vad dal segretari general... J'andreú dal ministr s'a fa bsogn... A l'è un'onta për tut l'ufissi c'a j suceda d'l'cose parei... La moral prima d'tut... a l'è... i diria... 'l mei prinssipí... La moral!

MOTON C'a dia, cavajer, c'a j guarda sí c'a veno ansema protet e protettor.

'L CAP SESSION E mi i coro subit dal segretari general (via).

MOTON Benone! Monssú Travet i chërdo c'a l'è bele serví, e chi sa che soa promossion a m'vena nen a mi, o se nen la promossion, almen la gratificassion sicura (a fa un gran inchin al Comendator c'a intra e va a drita).