Sena sesta

'L Comendator e detti.

'L COMENDATOR (d'cativ umor e brusch al Cap session) Cavajer, a l'è chiel chi sërco.

'L CAP SESSION (tut doss) I son ai so ordin, Comendator.

'L COMENDATOR (a Moton e Rusca) Lor c'a vado ai so cancei.

MOTON (pian) Miraco, ma la bomba a sciopa adess (via con Rusca).

'L COMENDATOR A l'è a chiel, cavajer, ch'i devo die grassie, nè?

'L CAP SESSION D'cosa...? I capisso pa, i seu pa...

'L COMENDATOR I veno adess dal segretari general: ma prima che 'l segretari general a m'mandeissa a ciamé, i seu c'a j'era staje chiel.

'L CAP SESSION Mi?... A peul esse... sí, për rason d'ufissi.

'L COMENDATOR Për rason d'soa malignità c'a l'è 'ndait a sparge d'calunie su me cont.

'L CAP SESSION Comendator!... I lo assicuro...

'L COMENDATOR E d'calunie che tuta mia condota, che l'integrità d'tuta la mia vita a dëvia rende impossibil d'chërde... Epura no. Për quanto un a sia stait onest, a basta d'un gianfotre c'a 'nventa 'na volta 'n oror su nostr cont për che tuti a j chërdo...

'L CAP SESSION Mi j'eu inventà gnente...

'L COMENDATOR Ah! vëdlo c'a l'è chiel c'a l'ha parlà...

'L CAP SESSION A l'han parlane tuti... A j'è cors d'le vos për l'ufissi e mi anssi j'eu combatuje... Côle vos a saran andaite fina dal segretari general... Le aparensse d'altronde... So ampressëman trop marcà, i diria, për côl impiegato... Vëde a vni sí la fomna... Savei che chiel a l'acompagnava al teatro... cosa i seine mi? 'L mond a l'è cosí gram!

'L COMENDATOR Sí: e chiel a n'è un esempi.

'L CAP SESSION Comendator!... Salo d'chi c'a l'è 'l tort pi gross? A l'è d'côl... j'ancalria a dí, d'côl poch d'bon d'monssú Travet, 'l qual a l'ha butame sú d'le arie e a l'ha avú 'l stomi d'vantessne publicament.

'L COMENDATOR Lolí a l'è impossibil.

'L CAP SESSION I j ciam përdon. A l'ha mach da interoghé monssú Moton e monssú Rusca, c'a l'han sentilo bele lor. S'a veul chì j fassa vni?...

'L COMENDATOR No, no!...

'L CAP SESSION E peui bele mi...

'L COMENDATOR Col bônom a l'avrà forse dit quaich gofaria, ma a l'è incapace d'avei mentí e an so disdoro ancora!... Propi c'a s'peul pi nen fesse un po' d'ben. I volía riparé a le tante ingiustissie c'a l'han faje a côl galantom, e eco che a m'accuso d'la manera la pi infame, e invece d'feje d'avantage a côl pover diavo, i lo ruino d'pianta. 'L segretari general a l'ha decis d'mandelo an Sicilia.

'L CAP SESSION (Benone! A l'è mi ch'j'eu consiliajlo).

'L COMENDATOR Un pare d'famia!

'L CAP SESSION (J'eu mai pi tass' d'andeje a dé côla neuva) Comandlo pi niente da mi?

'L COMENDATOR No. C'a vada pura con la sodisfassion d'avei fait 'na bela assion.

'L CAP SESSION (Sí c'a cica!) (Via).

'L COMENDATOR Côl a l'è 'na bestia grama chiel sí!... E ben, a 'ndarà ananss d'pi che j autri.