Sena quinta

Brigida, Giachëtta, Paolin, peui Marianin e detti.

BRIGIDA A l'è monssú Giachëtta con sor Paolin.

TRAVET (a Madama) E ben? Cosa j'ômne da dije?

MADAMA TRAVET C'a veno pura.

TRAVET Avanti, avanti.

GIACHËTTA (pôssand Paolin) Sentëstu? A t'dio avanti: dunque marcia.

PAOLIN C'a scuso... J'eu ben l'onor d'riverije...

GIACHËTTA Cerea, monssú e madama... Ma i vëddo nen tota Marianin bele sí... l'ômne da mandela a ciamé si o no?

TRAVET (a guarda soridend soa fomna) Cosa na dijstu?

MADAMA TRAVET Sí, sí. Brigida, dije a Marianin c'a vena sí.

GIACHËTTA Dunque a va benone. I sôma inteis d'tut. Paolin e Marianin a s'mario. Mi j'assicuro fin d'adess mia eredità ai fieui c'a l'avran.

TRAVET Ma no, ma no...

GIACHËTTA C'a m'lassa fé. Ij me dnè i veui pa portemje al mond d'd'là con mi. D'parent i n'eu gnun che quaich lontan, che quand ch'j'era un pover diavo a l'han mai volsume nen mach agiuté, ma gnanca conosse... Dunque chiel, monssú Travet, a aceta la posission ch'j'eu dije.

TRAVET Ben volonté, ma...

GIACHËTTA E mi, bele stamatin j'eu già tirà 'na riga ant ij nostri liber s'la partia d'so debit.

TRAVET Momenti, momenti. Lolí peui a sta nen.

GIACHËTTA Përchè c'a sta nen?

TRAVET Lon ch'i devo i devo, e i veui paghelo.

GIACHËTTA C'a fassa un po' 'l piasí...

TRAVET A l'è nen giust che chiel a l'abia da perde lolí.

GIACHËTTA E se mi i veui perdlo? E se mi i veui nen c'a m'paga? J'elo quaicadun c'a peussa obligheme?

TRAVET Sí sgnor; i j son mi.

GIACHËTTA I voria vëdla costa.

TRAVET A la vëdrà sicura.

GIACHËTTA Già, chiel a l'è sempre stait tëstass coma un mat.

PAOLIN Ma Giachëtta...

TRAVET Mi i sareu tëstass, ma chiel a l'è d'co un bel ostinà.

GIACHËTTA C'a fassa 'l piasi, c'a m'irita nen.

TRAVET A l'è chiel c'a m'irita.

MADAMA TRAVET Travet...

GIACHËTTA Un benedet om côl lí c'a s'peul nen parlessje an santa pas.

TRAVET Ah! A l'è mi ch'i son parei?... Pitost chiel 'n original c'a veul sente gnune rason.

GIACHËTTA A l'è chiel 'n original. Dova c'a son ste rason?

TRAVET Chiel a veul umilieme. Chërdlo che côl matrimonio noi aitri i s'decido a felo mach për interesse?

PAOLIN Për carità! C'a s'buto nen a quistioné për lon adess...

GIACHËTTA Eh! sta' ciuto ti, ch't'las nen da 'ntreje.

PAOLIN A m'smia ch'd'sí.

MADAMA TRAVET Là, adess, për una cianfruscola parei, veulne?...

GIACHËTTA I veui nen esse tratà coma un bambiflo.

TRAVET E mi i veui nen c'a m'perdo 'l rispet.

GIACHËTTA Già: chiel a s'chërd d'fene 'na grassia a dene soa fia.

PAOLIN Ma, Giachëtta, për carità.

TRAVET A l'è chiel c'a s'pensa d'fé nostra fortuna con côl matrimoni.

GIACHËTTA Veullo forse di c'a sia soa disgrassia?

TRAVET A j smijlo che mia fia a s'merita nen un tanto onor?

PAOLIN Ma no, ma no, monssú Travet, i lo prego.

MADAMA TRAVET A l'è fait. Côi doi lí a bsogna sempre c'a ruso.