Sena dodicésima

Marianin e Brigida.

BRIGIDA Cosa c'a l'ha, tota, c'a l'ha le lagrime a j'euj?

MARIANIN Gnente, gnente...

BRIGIDA Oh! lo 'ndvino pro mi, a sarà Madama c'a l'ha piantaje quaich noiosa d'le solite. Mia cara tota, s'a s'sagrina d'côla manera a tute le malignità c'a j fa Madama, a l'ha da pioré da 'n'alba a 'n'autra. Eh! le cose a van pa pià da për parei... C'a guarda mi!... A m'strapasso peui tut 'l santo dí, monssú e madama. Si j'aveissa da piemla, i vniría maira coma n'ancioa, e lolí m'convniría pa vaire. Anvece 'na socrolà d'spale, e ciao.

MARIANIN Oh! ti a l'è 'n'autra cosa... Ti t'l'as 'n autr umor... Mi le parole brusche a m'fan tropa pena...

BRIGIDA Veulla giughé che mi i son capace d'dije 'na cosa c'a la consola tuta?

MARIANIN Ti! Oh cosa veusstu dime?

BRIGIDA J'eu 'na comission da feje.

MARIANIN Na comission! A mi! Da par d'chi?

BRIGIDA Da part d'monssú Giachëtta.

MARIANIN Ah! S'a l'è vnú sí chiel stamatin a parleje a papà.

BRIGIDA E ben, a smia che adess a l'è a chila c'a veul parleje, e pi nen a so pare.

MARIANIN E cos'astu da dirne? Cosa ch'i peuss avei da fé mi con chiel?

BRIGIDA Eh momenti, momenti. C'a m'dia prima chila cosa c'a l'ha faje mach adess Madama. C'a guarda lí c'a i pensava gnanca pi.

MARIANIN Mama a veul pi nen ch'i vada al teatro.

BRIGIDA Oh 'n'autra!

MARIANIN A m'obliga a sté a cà për goerné 'l pcit.

BRIGIDA Oh! che secatura!

MARIANIN Përchè?

BRIGIDA I dio për chila. (Sacocin! Com'arangela? I sarío stait cosí alegher!)

MARIANIN Dunque, dis, dis cosa c'a l'è ch'i t'las da dime da parte d'monssú Giachëtta!

BRIGIDA A s'dubita già d'quaicosa chila.

MARIANIN Mi no.

BRIGIDA E përchè 'nlora c'a ven rossa e c'a s'volta an là?

MARIANIN A l'è ch't'm'guardi d' 'na certa manera.

BRIGIDA E ben, s'a s'dubita d'niente i vad a butela mi s'la strà... A l'è monssú Giachëtta c'a m'ha dime ch'i j parleissa, ma nen për chiel, për 'n'autra persona.

MARIANIN Ah! për 'n'autra persona!...

BRIGIDA Sí, për sor Paolin, so socio... A lo conoss ben sor Paolin?

MARIANIN Sí... cioè... d'vista.

BRIGIDA A l'è facil. Bele con sti frëschet a l'è sempre piantà là ant la contrà dnanss a nostre fnestre con 'l bech voltà anssú.

MARIANIN Ah! T'las vëdulo ti?

BRIGIDA E chila?

MARIANIN Mi?... Oh! cosa ch't'm'ciami' ti?

BRIGIDA A j fala pena ch'i teno sti discors? S'a veul mi i parlo d'autr?...

MARIANIN (vivament) No, no...

BRIGIDA Ah! ah!

MARIANIN T'ses cativa... Disme lon ch'i t'las da dime.

BRIGIDA Dunque stamatin ch'i vaia a cà d'an piassa, i son passà dnanss a la botega...

MARIANIN D'Paolin?

BRIGIDA D'Paolin... sí sgnora. Monssú Giachëtta a l'era lí s'la porta con le man an sacocia a guardé a fioché c'a s'dandinava an subiand second so solit. «Ehi! bela fia», a m'ha dime... Përchè tut rustich c'a l'è, certe volte a parla pa gnanca mal. «Cosa c'a comanda?», mi j'eu rësponduje, fërmandme su doi pé. «I m'eve l'aria d'esse 'na furbaciona, voi», a m'ha dime. «Eh! c'a guarda lí - mi j'eu rësponduje - i sôma peui pa gnanca un terpo». «Voi i dovrij agiuteme a arangié 'n afé: i farij 'na bon'opera, e i guadagnërij... (fërmandsse) mia bona grassia. I son ficame ant ij corn d'marié me Paolin...»

MARIANIN Marielo?... O Dio!... Con chi?

BRIGIDA Ah! sossí a l'interessa?

MARIANIN Për carità! fame nen languí. Chi c'a veul feje sposé a Paolin?

BRIGIDA 'Na brava e bela tota, che Paolin a n'è innamorà coma un gat.

MARIANIN E chi c'a l'è?

BRIGIDA Andvinla nen? A sta nen lontan da sí: a l'è timida, virtuosa, modesta, bionda, e a s'ciama...

MARIANIN Ah!

BRIGIDA A s'ciama...

MARIANIN (arossend) Marianin.

BRIGIDA Brava!

MARIANIN Da bon? I son mi?

BRIGIDA Eh! malissiosëtta... A lo savia già prima d'mi.

MARIANIN E monssú Giachëtta a veul ch'i s'sposo?

BRIGIDA Sicura. A m'ha dime c'a l'ha butaje so puntilio lí drinta, e che s'a l'aveissa da mandé a 'n aria mes Turin, a veul che lolí a s'fassa.

MARIANIN Oh che brav'om!

BRIGIDA Ma prima a veul esse sicur che so Paolin... A j veul ben coma s'a fussa so fieul, sala!

MARIANIN Che so Paolin... cosa?

BRIGIDA A sia corispost...

MARIANIN (vivament) Oh! Disie... (a s'interomp).

BRIGIDA Cosa?

MARIANIN Niente, niente.

BRIGIDA Për lon a l'ha penssà c'a bsognria che lor doi a s'parleisso.

MARIANIN Chi? Mi e Paolin?

BRIGIDA Për l'apunto.

MARIANIN Oh Dio! Mi i m'ancalreu mai.

BRIGIDA Eh! A la mangërà pa, no. Côl fieul a l'è ancora pi timid che chila. Për lolí a m'ha ciamame coma fé, e mi j'eu dije che quand madama a fussa surtia, a s'na vneissa d'sora con Paolin.

MARIANIN T'l'as dije lon?

BRIGIDA Sí sgnora.

MARIANIN (seriament) E t'l'as fait ben mal. Lolí, i t'lo dio ciair, a m'pias niente d'autut, e c'a t'ariva mai pi!

BRIGIDA No, sgnora, ma adess a l'è fait: a momenti a saran sí. Eh! c'a senta, a son lor...

MARIANIN O povra mi!... Mi i veui nen ricevje, mi i veui nen.

BRIGIDA Veulla ch'i j manda via?...

MARIANIN Coma fé?

BRIGIDA C'a s'crussia nen. I son mi sí, a j'è monssú Giachëtta, che mal veul-la c'a i sia?

MARIANIN (O Dio! I m'sento a tramolé le gambe).