Sena quindicesima

Barbarot e Brigida.

Tuta sta sena an pressa.

BRIGIDA Bravo! A ven a temp!

BARBAROT Cosa j'elo?

BRIGIDA Tuta la cà sotsora. Madama a smia un basilisch. A l'ha fait pioré la tota, a l'è sautà a j'eui a monssú Giachëtta, a l'ha fait core sor Paolin e a l'ha mandame via mi zichin zichet.

BARBAROT Oh 'n'autra! Ma cosa c'a j'intro monssú Giachëtta e Paolin?

BRIGIDA Paolin... A lo conoss ben chiel?

BARBAROT Altro! j'ero compagn d'scola.

BRIGIDA Paolin a l'è innamorà d'tota Marianin; tota Marianin a l'è 'nnamorà d'Paolin.

BARBAROT O bela!

BRIGIDA Monssú Giachëtta a veul c'a s'sposo. Monssú e Madama a veulo nen. Coma peul capí, mi j'eu pià le part d'la tota. Doi giovnot c'a s'veulo ben, lolí a m'ha tocame 'l cheur; mi j'eu 'l cheur tëner...

BARBAROT I lo seu.

BRIGIDA E peui mi a tota Marianin i veui ben, e s'a m'rincress un po' chité sta cà, a l'è mach për chila, ma s'a s'maria, i veui andé mi a servila... Povra fia! sí drinta a l'è sacrificà e soa marastra a j na fa trangugié d'côle grosse... C'a s'figura c'a veul gnanca lassela andé al teatro stasseira!...

BARBAROT No?... Ma anlora...

BRIGIDA Un oror! Adess che Madama a l'era surtia, Monssú Giachëtta a l'è vnú sú con Paolin për intendssëla... Ma eco che ant 'l pi bon Madama a torna, e a n'ciapa lí sul lobiot. A l'ha fait 'na sena d'le masche!... Dop tut 'l rest a l'ha vorssusla pié con mi, ma mi ch'j'eu gnun peil s'la lenga e ch'i seu fé valei mia rason, i son pa lassame sofié sota 'l nas e j'eu rëspunduje com a s'dev.

BARBAROT (Che patalica!) Ansomma chila a l'han mandala via e nostra partia d'stasseira a l'è 'ndaita an aria.

BRIGIDA Mandame via... cioè... a l'è mi ch'i son licenssiame.

BARBAROT A fa l'istess.

BRIGIDA Quant a la partia d'stasseira i la farôma l'istess.

BARBAROT Ma s'a j'è la tota.

BRIGIDA La tota a starà d'd'là a goerné 'l pcit e noiaitri an cusina.

BARBAROT Ma...

BRIGIDA Chërdlo ch'i veuja ancora geneme për sta gent sí?

BARBAROT Diavo! Diavo!

BRIGIDA Cosa! A darijlo andarè?

BARBAROT No... ma...

BRIGIDA S'a l'è vera c'a m'veul ben com'a m'ha dime tante volte...

BARBAROT Oh! për lolí a l'è 'na verità sacrosanta.

BRIGIDA S'a l'è nen un cicin buí...

BARBAROT Mi? Mai!

BRIGIDA A vnirà.

BARBAROT I vnireu.

BRIGIDA Con le bôte.

BARBAROT Lolí a s'intend.

BRIGIDA Dunque i lo speto.

BARBAROT Sicura.

BRIGIDA Cerea.

BARBAROT Cerea, me cheur (via un dal fond e l'autra an cusina).

Fin d'l'at prim