Sena sconda

L' Cap session e detti.

'L CAP SESSION (con un fass d'carte aria bestia e d'importanssa) Cosa fómne bele sí? Già! la sigala an boca. Sgnori, a s'ven pa... i diria... a l'ufissi për fumé.

RUSCA No sgnor... ma j'avia tant mal ai dent e i son fërmame sí un poch...

MOTON Mi i son vnú për parleje a monssú Travet, e i lo spetava.

'L CAP SESSION Come! I lo spetava? Elo ancora nen vnú?

MOTON J'eu ancora nen vëdulo.

'L CAP SESSION (a va a guardé) Cospeto! A j'è 'ncora nen... gnanca so capel. A l'è 'na negligenssa... i diria... un po' tropa. (A guarda la mostra) A passa già d'un quart d'ora, 'l maximum d'la toleranssa. C'a fassa 'l piasí, monssú Moton, c'a ciama l'ussiè.

MOTON Subit, sor cavajer.

'L CAP SESSION (tra chiel, ralegrandse) (Cavajer! A sona propi bin côl titol!)

MOTON (a la porta) Gioan (a j ven'n ussiè).

'L CAP SESSION Pié côl liber e portelo d'd'là ant mia stanssa. Côi c'a j son a j son, i diria, e côi c'a j son nen a j son nen!

RUSCA (Bravo!) (L'ussiè a eseguiss).

'L CAP SESSION Sgnori, j'eu portaje d'travaj. Monssú Busca...

RUSCA Pardon! C'a përmëtta, cavajer, che prima d'parlé d'le cose nojose, i parlo d'côle bele e c'a fan piasí. Mi j'eu ancora da ralegreme con chiel d'la cros c'a l'han daje.

'L CAP SESSION (con compiasenssa) Oh! pa niente, pa niente.

MOTON Cosa dislo? A l'è sicura che chiel a s'merita motoben d'pi.

RUSCA Oh certo; côla lí a l'è una d'le poche cros c'a sio staite ben daite.

'L CAP SESSION (dasendse d'arie) Sí. Soa Ecelenssa a l'è degnasse agradí ij me deboi servissi... A m'è stame una marca, i diria, c'a m'ha... c'a m'ha propi... com'a s'diria?

MOTON Comovume.

'L CAP SESSION Giusta, comovume... Përchè a l'è vnú spontaneo... A sa ben... A j na j'è tanti c'a la ciamo... Mi, Dio guarda! j'eu pa ciamala... i j pensava gnanca.

RUSCA A j pensavo ben tuti për chiel. Tut 'l mond a s'disia già: ma com'elo c'a l'han ancora nen daje la cros? ma com'elo?

'L CAP SESSION Da bon?

RUSCA Sicura, sor cavajer.

MOTON E an tut l'ufissi a l'ha fait un piasiron; tanto che mi, interpretand la volontà general, j'eu duvert 'na sotoscrission për presenteje, noiaitri so felici subordinà, una cros an atestato d'nostra stima e d'nostra afession.

'L CAP SESSION A l'ha fait lon... chiel?

MOTON Sí sgnor, sor cavajer.

RUSCA E mi i son sotoscrivume bele 'l prim, sor cavajer.

MOTON (Che busiard!)

'L CAP SESSION (I son bele comoss!) Sgnori... me cari... lor... lon c'a fan... j'assicuro... i peus nen esprimje... ma i m'n'arcordrai... oh! a vëdran ch'i m'n'arcordrai... Antant c'a pio si 'l travaj... J'avia destinaje tut sossí, ma i penso c'a l'è trop. Lor a son giovo... i seu lon c'a l'è... a l'han 'l sang c'a bogia, i diria. Chiel, monssú Rusca, c'a pia mach ste doi pratiche e chiel, monssú Moton, ste doi autre. Con doi letere a pr'un a s'na gavo. 'L rest i j lo darôma sí a monssú Travet (a eseguiss).

RUSCA (Quaicosa j'ôma già guadagnaje).

'L CAP SESSION E se mai a l'han da seurti un po' prima d'l'ora... për ij so afé... eh eh! a s'sa ben... c'a fasso in acorto modo, mi i saréreu n'euj... basta c'a continuo a regolesse ben.

RUSCA C'a staga persuas, cavajer.

MOTON A peul esse tranquil, sor cavajer.

'L CAP SESSION Quand c'a j vena monssú Travet, c'a m'lo mando subit d'd'là.

RUSCA Sí sgnor, sor cavajer.

MOTON I mancrôma nen, cavajer ('l Cap via).

RUSCA Che bonom!

MOTON Gonfiandlo un poch d'eloge, chiel lí a s'na fa lon c'a s'veul.

RUSCA A l'è lon c'a sa nen fé côl povr diavo d'monssú Travet.

MOTON E d'co a peul pa sciairelo.

RUSCA (guardand le carte) Oh! che afè noios c'a m'ha dame bele sí. J'eu pa veuja d'romp'me la testa ant ste storie. Mi i lo dagh sí a monssú Travet: a l'è so afé.

MOTON E mi d'co... I m'teno mach côsta c'a l'è facil (a eseguisso e peui a van tacà la stua).