Sena sétima

'L Comendator e 'l Cap d'session.

'L CAP SESSION (surtend da soa stanssa) Oh! sor Comendator!

'L COMENDATOR Cerea, cavajer! J'andasia giusta a trovelo chiel.

'L CAP SESSION Che degnassion! Alo d'absogn d'mi? C'a comanda.

'L COMENDATOR I veui parleje d'le promossion e d'le gratificassion.

'L CAP SESSION Alo già esaminà le proposte ch'j'eu trasmëtuje mach adess?

'L COMENDATOR Sí sgnor; e i son stupime c'a l'abia nen tnú cont d' 'na racomandassion ch'j'avia faje.

'L CAP SESSION Cosa mai?

'L COMENDATOR Côl pover Travet a l'ha dësmentiamlo d'pianta.

'L CAP SESSION Oh! no sgnor ch'j'eu pa dësmentialo; j'eu lassalo, i diria, andaré a posta.

'L COMENDATOR Përchè?

'L CAP SESSION I son niente d'autut content d'chiel. A l'è un po' d'temp c'a l'è d'una negligenssa!... Stamatin a dëvia porteme 'n stat ch'j'avia racomandaje vivament, e a l'ha portame gnente, e oltre d'lon a l'è vnú a l'ufissi tard coma tut.

'L COMENDATOR D'la tardanssa c'a j na daga gnune colpe. A l'è an causa mia c'a l'ha tardà e i lo prego d'considerelo coma vnú a temp.

'L CAP SESSION Se chiel a lo comanda...

'L COMENDATOR No Sgnor, i lo comando nen, i lo prego.

'L CAP SESSION Va ben... Ma c'a pensa che le ingiustissie a fan cativ efet.

'L COMENDATOR Sí sgnor ch'i j penso, e a l'è për lon ch'i chërdo c'a l'è temp d'rende giustissia a côl brav om che fin adess a l'è stait dësconossú.

'L CAP SESSION Ma coma?

'L COMENDATOR Bele chiel, cavajer, a s'è lassasse ingané o da un'antipatia o da d'fausse relassion.

'L CAP SESSION Comendator, j'assicuro...

'L COMENDATOR E mi d'co sul prinssipi j'avia poca stima d'côl impiegato; ma j'eu avú ocasion d'conosslo pi da d'avsin. J'eu vist c'a l'è un galantom, pien d'bona volontà e c'a manca nen d'savei so afé. J'eu esaminà so stat d'servissi e so travaj, e j'eu vist c'a l'ha 32 ani d'impiegh, e c'a l'han già faine passé dnans ingiustament pi d'des; che côl bonom a s'lamenta mai, a travaja sempre, e ij doi ters d'ij afé d'soa session a son spedí da chiel.

'L CAP SESSION Ma...

'L COMENDATOR C'a fassa 'l plasí d'feje atenssion e a vëdrà s'a l'è nen vera. A m'smia adunque c'a sia degn d'esse propost e a la promossion c'a j ven e për 'na gratificassion.

'L CAP SESSION Se chiel a chërd, se chiel a veul... mi i son dispost... Ma 'l diavo a l'è che a côl post c'a j vniria a j'è già propost un autr e 'l segretari general a l'ha già quasi daje soa parola. Quant a le gratificassion a j'è poch fondo disponibil, e gaveila a Moton e a Rusca, a saria feje, a cöi bravi fieui, i diria, un tort manifest.

'L COMENDATOR Cosa! Côi doi fanean e c'a fan nen autr che fumé e scaudesse tacà la stua?... Là, là, cavajer, c'a m'chërda, a l'è mei ch'j'arangio lon.