UPIRANTI^*

*

VIGILIA AMMUCCIATA

– Jhii!... Murèmu d' 'u friddu, signurinu!

– Voscenza nni fa 'nsordu 'i caritati!...

– Moru d' 'a fami!... – Ha' da stamatinu

ca non mangiamu!... – Comu vi chiamati?

– Ju Nardu. – Ju Ninu. – Ninu comu? – Ninu.

– Ma di cu' siti figghi?... Unni stati?

– Semu pigghiati d' 'u 'spitali, Ninu

e ju!... – Durmemu arreri 'i purticati!...

– Svinturateddi!... Te' cca, v' 'i spartiti!

– 'U Signuri ci 'a renni!... – 'Mpari!... – Auh!...

– E chi fu, 'nt' 'a sacchetta, v' 'i mittiti?...

– Ppi l'òpira!... Va, a 'st'ura 'ncuminciau!...

Ci sunnu? – Giusti giusti !... – E pp' 'a simenza?

– Don Salarinu a mia mi fa cridenza!...

Note. – Voscenza (vostra eccellenza) – Caritati (carità) – Moru (muoio) – Unni stati (dove abitate) – Pigghiati d'u spitali (presi dall'ospizio dei trovatelli) – V' 'i spartiti (ve li dividete) – 'U Signuri ci la renni (Dio gliela rende) – Opira (il teatrino delle marionette) – Simenzia (i semi abbrustoliti, o bruscolini) – Don Salarinu (famoso venditore di semi abbrustoliti, dentro il teatro di marionette del Grasso in Catania. Si chiamava Felice, ma tutti i monelli frequentatori assidui del vecchio fondaco, lo chiamavano Saladino, non so piú per quale ragione).