ACQUAJOLA

I.

Tanuzza l'acquajola è 'na carusa,

ma 'na carusa, va, ppi la patana!

Abbasta a diri ca 'na cità sana

nni sta niscennu pazza furiusa!

Già tu non sai ch'è duci la gazzusa

'ntra lu biccheri ca ti sguazza Tana!...

E la stissa acqua di la Reitana

'nn'idda è chiù frisca ed è chiù sapurusa.

Cu 'ddi capiddi a la napulitana,

si tu vidissi quantè ginïusa!...

Pari 'na puddastredda paduvana.

Ma chi t'ha diri, ju non sugnu 'n gana;

vacci a 'cattari l'acqua, e ccu 'sta scusa

sammillu a diri tu sidd'è bagiana.

Note.– Carusa (ragazza) – Ppi la patana!... (esclamazione, come per dire: perbacco) – 'Na cità sana (una città intera) – Duci (dolce) – Sguazza (sciacqua) – Acqua di la Reitana (l'acqua potabile, che giunge in Catania dalla contrada Reitana).– 'Nn'idda (da lei) – Ginïusa! (attraente, che dà a genio) – Puddastredda (pollastrina: le pollastre e le galline padovane hanno un ciuffo in testa, a diadema) – Non sugnu 'n gana (non sono in brio) – A 'ccattati (a comprare) – Sammillu (sàppimilo) – Bagiana (elegante, graziosa).

II.

Avi lu ciospu 'mmenzu di lu Chianu,

propriamenti all'Università,

e ha' vidiri la curti ca ci fanu

li giuvinotti, passannu di ddà!

A la scola ci vanu e non ci vanu;

ma a Tana non la mòddanu, cusà!...

E idda servi a tutti, a manu a manu,

vinnennu l'acqua frisca 'nquantità'...

Ci vannu ccu 'sta scusa, e d'accussì,

idda si sta facènnu ccu li chippi,

e iddi si nni vannu beddi unchi.

Nni sacciu unu, un certu don Fifì,

ca ppi la tanta acqua ca si vippi,

dintra la panza fici li larunchi!...

Note. – Chiospu (idiotismo: kiosco) – Chianu (la piazza) – Ci fanu (le fanno) – Ci vanu (ci vanno) – Non la mòddanu (non la lasciano per corto) – Cusà (chi sà) – Chippi (grasso, omento, zerbo – farisi cu li chippi, dicesi pure di chi si arricchisce con un facile commercio) – Unchi (gonfi) – Nni sacciu (ne so, ne conosco) – Si vippi (bevve) – Larunchi (ranocchie).

III.

E fùssiru picciotti sulamenti!...

Ma si mi cridi, non dicu bucìa,

ci su' taluni, misi 'nfantasia...

certi sciabbecchi!... E fannu cumprimenti!...

Ju ci lu dissi: – mettatillu a menti,

Tanuzza, e siddu ha' a fari ôcche pazzia,

falla cu tutti, macari cu mia...

ma cu 'ssi vecchi no, ca su' fitenti!...

Ma Tana è sperta... cu 'dd'occhi lucenti,

fratuzzu beddu, quannu ti talìa,

ti vota dintra e fora, tempu nenti.

E ci l'ha dittu bellu, chiaramenti,

ad unu ad unu: sciù a vossignuria!

non sugnu pani ppi li vostri denti!

Note. – Bucìa (bugìa) – Sciabbecchi (barche di vecchio tipo e di forma goffa; dicesi comunemente dei vecchi e delle vecchie pretenziosi e pesanti) – Mettatillu (mèttitelo) – Ôcche (qualche) – Fratuzzu beddu (equivale: fratello, fratello mio) – Ti talìa (ti guarda) – Ti vota dintra e fora (ti scruta fino in fondo) – Sciù (voce che si vuol fare per cacciar mosche... ed anche gente noiosa)