JU VOGGHIU PRI MUGGHIERI

Ju vogghiu pri mugghieri 'na bammina

ca s'ha' fari ccu mia lu primu amuri;

la vogghiu bedda, sperta e malantrina,

ccu la vuccuzza duci di sapuri.

L'occhi l'ha' a aviri nïuri, spaccati,

comu la minnulicchia majulina,

li capidduzzi longhi e 'ncannulati,

jttati a trizza, arreri di la schina.

La vogghiu aperta comu 'na bannera,

sincera 'ntra la facci e 'ntra lu fari,

bedda di cori e franca di manera,

'ntinna parata, 'mmenzu di lu mari.

Baggianedda, la vogghiu, giniusa,

vucca di meli e fimmina di paci;

e... s'arrinesci tanticchia gilusa,

vi dicu francu c' 'un mi dispiaci!

Note. – Mugghieri (moglie) – Bammina (bambina) – Sperta (scaltra) – Malantrina (coraggiosa, energica) – Vuccuzza (boccuccia) – Nïuri (neri) – Minnulicchia majulina (la mandorla verde di maggio) – 'Ncannulati (ad anelli) – Jttati (gittati) – Arreri (dietro) – Schina (schiena) – 'Ntinna (antenna) – Baggianedda (elegante) – Giniusa (simpatica) – S'arrinesci (se riesce) – Tanticchia (un tantino) – C' 'un (che non).