A LI VISITATURI DI LU CAMPUSANTU

'NTRA LU JORNU DI LI MORTI

I.

Matruzzi, spusi, figghi, soru e frati,

ca 'ntra 'stu jornu a Locu Santu jti,

vistuti a luttu, tutti angustiati,

ccu l'occhi sicchi, pri quantu chianciti!

Gintuzzi boni ca frunni cugghiti,

e li fossi di ciuri Ci parati;

li figghi, li matruzzi e li mariti,

vi vìdunu di 'ncelu e su' priati!

Dicitimi: un cunfortu non sintiti,

quannu li lampiceddi Ci addumati,

quannu 'sta fisticedda Ci faciti?

Vui mi sintiti e l'occhi v'asciucati...

Conusciu lu duluri ca suffriti,

gintuzzi ca li Fossi arrifriscati!

Note. – Sora (sorelle) – Frati (fratelli) – Jti (andati) – Chianciti (piangete) – Cugghiti (cogliete) –Parati (ornate) – Priati (contenti, più che contenti) – Lampiceddi (lampadine) – Addumati (accendete) – Fisticedda (festicciuola).

II.

Gintazzi brutti, tristi e scrianzati,

ca 'ntra 'stu jornu a Locu Santu jti,

tutti fistanti, mezzi avvinazzati,

e davanti li Morti ci riditi!...

Gintazzi ca rispettu non aviti,

mancu pri Chiddi ca su' suttirrati,

vagabunnazzi ca mancu chianciti

accostu di li matri scunsulati!

Dicitimi, lu cori unni l'aviti?

Sa quali riligioni prufissati?

Li vostri Morti dunni li tiniti?

Ju vi vurrissi vidiri arraggiati,

comu li cani morti di la siti,

gintazzi ca li Fossi scarpisati!

Note. – Tinti (cattivi) – Vagabunnazzi (vagabondacci) – Dunni (dove) – Arraggiati (arrabbiati) – Scarpisati (calpestate).