'A SCOLA 'E BALLU

('ntra la vanedda di San Birillu)

– Apprassi tutti, vah... ballu curruttu?

– Facemu quattru pistuletti, Tinu!

– E torna! Talïàti quant'è 'ncuttu!...

Non ci ballu, cu tia, ca si' mmastinu.

– Ma... n'abballi cu nuddu ?... – Pricchì? – Ammuttu

macari a Cristu!... – Forti si' di schinu!

– E suddu parri ammàtula t'abbuttu

'a facci a timpulati! – Senti... 'u vinu

ti fa sparrari, Santu, e ti cumpatu;

ma si non fussi 'u vinu... pri 'ddu Diu!...

– Chi ci facissi... un vàrziri sartatu?

Nesci fora e t' 'u dicu!... Prominà!...

– Tinu, Santu!... Nisciti? – Amicu miu,

p' 'u ballu c'àmu a fari, è strittu, cca!

Note. – Vanedda (vicolo) – Ballu curruttu (specie di contraddanza) – Pistuletti (sgambetti) – Taliàti (guardate) – 'Ncuttu (nojoso, insistente, prolisso) – Nuddu (nessuno) – Ammuttu (spingo, dò urtoni) – Forti sì di schinu! (frase caratteristica del gergo, come per dire: fai il gradasso ma non ti piglio sul serio) – Suddu (se) – Ammàtula (inutilmente, senza profitto: qui è detto nel senso di: senza rispetto) – T'abbuttu (ti gonfio, t'impinzo) – Timpulati (schiaffi) – Ti cumpatu (ti compatisco) – Nesci (esci) – Nisciti? (uscite?) – Ballu (nel senso figurato di tirata, duello).