'A LA PISCARIA

– Chi fazzu vegnu?... Ah... don Pippineddu?

– Cca sugnu, cavaleri!... Unn'âmu a jri?

– Lèviti, ca 'u canusciu, o' baruneddu!

– A comu 'sti palàmiti? – A du' liri.

– Chi sunnu, trigghi d'àlica? – Chiù beddu,

d' 'a trigghia, é, 'u palamitu!... Ci arrìri?...

Chi ci pari, sangusu? Vah, ci 'u feddu?

– A vinticincu. – Mai, si nni pò jri.

L'urtima, siddu 'u voli, 'ossia fa a trenta.

'U tagghiu?... Quantu?... – Fanni un chilu e menzu.

– Ccu 'ammarinatu, l'agghiu, acitu e menta,

mangia un piattu propria arriali!...

– A mia, marchisi!... – E lèviti d' 'u menzu!

N' 'o vidi ca s' 'u metti 'nt' 'o giurnali?

Note. – La Pescheria di Catania è popolata d'uno sciame di fattorini da piazza, per lo più scalzi e scamiciati, che investono l'avventore per portargli a casa, dentro il paniero, di cui sono forniti, la spesa del giorno, solleticandolo con mille titoli onorifici e nobiliari; che spesso - pare impossibile? - riescono a commuoverlo e corromperlo!...

Fazzu (faccio) – Vegnu (vengo) – Cca, sugnu (sono qua) – Unn' âmu a jri? (Dove dobbiamo andare?) – Palàmitu (pesce quasi simile al tonno) – Arriri (ride) – Sangusu (pesce di egual forma del palàmitu, ma di molto più ordinario) – Trigghi d'àlica (triglie d'alga) – Beddu (bello, nel senso di buono) – Ci 'u feddu (glielo affetto) – Siddu (se) – 'Ossia (vossignoria) – Tagghiu (taglio).