LI MATRIMONII D'AUANNU

Sentu cuntari tanti e tanti cosi

di matrimoni veri mustruusi,

tra picciutteddi comu Diu li vosi

e vecchi stranchillati e scuncirtusi...

O beddu Amuri, sa unn'è ca posi

si non ti trovi 'npettu a li carusi;

si li buttuni stissi di li rosi

ti cangianu pri picciuli rinusi!?...

O matri carculanti e scialarati,

ca li figghiuzzi vostri vi vinniti

comu jmenti pri jri appaiati;

Sa pirchì è ca vi scrupuliati

sintennu di taluni chi sapiti

ca vinnunu li carni pri li strati?

Note.– D'auannu (di quest'anno, d'oggi) – Picciutteddi (giovanette) – Comu Diu li vosi (ben fatte, come Dio le volle) – Stranchillati (acciaccaticci) – Scuncirtusi (rivoltanti) – Carusi (ragazze) – Buttuni (bocciuoli) – Picciuli (spiccioli, quattrini) – Rinusi (renosi, sabbiosi, dicesi dei soldi di cattiva lega) – Carculanti (calcolatrici) – Scialarati (scellerate) – Vinniti (vendete) – Jmenti (giumente) –Vi scrupuliati (vi fate scrupolo).