L’autore

Sicome me piasarìa tanto, par quela s-ciantinela ca só bon, far calcossa de belo e de ùtile par el me poro dialeto strapassà, a go deciso de inpastar on altro bussolao. Anca se le me fadighe de scritor e de sostenidor de le lengue minoritarie, stante fin al dì de oncó le xe stà, de fato, ciapà sóto ganba e le xe passà no viste de sóto de i oci de i de pi, mi me taco al dito Spes ultima dea = La Speranza la xe l’ultima dea (a morire) e vago vanti co i me mati propòsiti. Saràlo on altro buso ne l’aqua? Anca se la resposta la fusse si, mi sèmeno lo stesso parché on sagio proverbio el dise: ‘se te vui rancurare bison ca te sìmini’.

Chissà se ghè anca on sol letore che el gavarà la costansa de lèsare i Ati da cao a coa e, par stima verso de elo, mi me fasso sù le màneghe e serco de inpiantar on altro ciodo.

On strucon a chi che me lese.

Antonio Balsemin

Roma, 03 setenbre 2005