| Indice | Parole: Alfabetica - Frequenza - Rovesciate - Lunghezza - Statistiche | Aiuto | Biblioteca IntraText |
| Antonio Balsemin Ati de i Apòstoli IntraText CT - Lettura del testo |
Capìtolo 6
L'istitussion de i sete
In quei giurni, quando che nava paràndose sù el nùmaro de i dissèpoli, xe nato on malcontento fra i elenisti verso i Ebrei, parché vegnéa trascurà le so vèdove ne la distribussion quotidiana. Lora i Dódese i ga convocà el grupo de i dissèpoli e i ga dito: "No xe giusto che noialtri trascuremo la parola de Dio par i mestieri de le cusine. Serché partanto, fradei, fra de voialtri sete òmini de bona reputassion, pieni de Spirito e de sagessa, a i quali afidare sto disinpegno. Noialtri, invesse, se dedicarèmo a la preghiera e al ministero de la parola". Ga piasso sta proposta a tuto el s-ciapo e i ga eleto Stefano, omo pien de fede e de Spirito Santo, Filipo, Pròcoro, Nicànore, Timòne, Parmenàs e Nicola, on prosèlito de Antiochia. I li ga presentà de dopo a i apòstoli i quali, dopo de gaver pregà, i ga inposto parsora de luri le man.
Intanto la parola de Dio la se difondéa e se moltiplicava grandamente el nùmaro de i dissèpoli a Gerusaleme; anca on grando nùmaro de sacerdoti i aderiva a la fede.
Stefano intanto, pien de grassia e de fortessa, el faséa gran prodigi e miràculi fra el pòpolo. Se ga fato vanti lora serti de la sinagoga dita de i "liberti" conprendente anca i Cirenei, i Alessandrini e altri de la Cilicia e de l'Asia, par desputare co Stefano, ma no i gera boni de tegner bota a la sapiensa inspirà co la qual elo el parlava. Partanto i ga insustà de le persone che le ga dito: "Lo gavemo sentìo pronunsiare espression blasfeme contra Mosè e contra Dio". E cussì i ga sobillà el pòpolo, i ansiani e i scribi, i ghè pionbà dosso, i lo ga brincà e i lo ga strapegà de fronte al sinedrio. I ga presentà de dopo de i falsi testimoni, che i ga dito: "Sto chì no el la finisse mai de proferir parole contra sto logo sacro e contra la lege. Lo gavemo sentìo dechiarare che Gesù el Nazareno el destrugerà sto logo e el pararà par aria le tradission tramandà da Mosè".
E tuti quei che i stava sentà nel sinedrio, fissando i oci su de lu, i ga visto el so volto conpagno de quelo de on àngelo.