Capìtolo 8

Saulo el gera fra quei che i aprovava la so ucision.

La Cesa la vien perseguità

In quel giorno xe s-ciopà na gran persecussion contra la Cesa de Gerusaleme e tuti, a ecession de i apòstoli, i xe stà despersi ne le rejon de la Giudea e de la Samaria. Persone pie le ga sepelìo Stefano e le ga fato gran luto par lu. Saulo intanto l’infuriava contra la Cesa e intrando ne le case el ciapava òmini e done e el li faséa mètare in preson.

Queli parò che i gera stà despersi i nava par el paese e i sparpajava la parola de Dio.

Filipo in Samaria

Filipo, nà in na sità de la Samaria, el ga scuminsià a predicar a luri el Cristo. E le calche de genti le faséa atension come i fusse un solo a le parole de Filipo sentèndolo parlar e vedendo i miràculi che elo el faséa. Da na mota de indemonià ussìa spìriti imondi, trando gran sighi e na mota de paralìtici e sòti i xe stà resanà. E ghè stà gran gioia in quela sità.

Simon el mago

Ghe gera da tenpo in sità on tale de nome Simon, dèdito a la magia, el qual el  mandava in giùgiole la popolassion de Samaria, proponèndose par on gran personajo. A lu aderiva tuti, picinini e grandi, esclamando: "Sto chì el xe la potensa de Dio, quela che xe ciamà Grande". I ghe dava ascolto, parché par na mota de tenpo el li gaveva fati strabiliare co le so magie. Ma quando che i ga scuminsià a crèdare a Filipo, che el portava la bona novela del regno de Dio e del nome de Gesù Cristo, òmini e done i se faséa batesare. Anca Simon el ga credù, el xe stà batesà e no el se stacava pi da Filipo. Elo el gera  fora de elo nel vèdare i signi e i gran prodigi che avegneva.

Fratanto i apòstoli, a Gerusaleme, i ga savudo che la Samaria la gaveva ciapà la parola de Dio e i ga mandà Piero e Giovani.

Luri i xe nà e i ga pregà par luri parché i ressevesse el Spirito Santo; no el gera infati ancora nà sóra a nissun de luri, ma i gera stà solo batesà nel nome del Signore Gesù. Lora i inponeva luri le man e queli i resseveva el Spirito Santo.

Simon, vedendo che el Spirito el vegnéa conferìo co l'inposission de le man de i apòstoli, el ga oferto luri de i schei disendo: "Dè anca a mi sto podere parché a chiunque mi inponga le man, elo el ciapi el Spirito Santo". Ma Piero el ghe ga risposto: "Le to palanche le vaga co ti in perdission, parché te te ghè onsà de pensare de cronprare co moneda el dóno de Dio. No ghè parte né sorte niuna par ti in sta roba, parché el to core no el xe reto davanti a Dio. Pèntete lora de sta to iniquità e prega el Signore che te sia pardonà sto pensiero. Te vedo infati sarà in fiele amaro e in séngie d'iniquità". Ga resposto Simon: "Preghè voialtri par mi el Signore, parché no me càpiti gnente de quelo ca gavì dito". Luri lora, dopo de gaver testimonià e anunsià la parola de Dio, i xe tornà a Gerusaleme e i evangelisava na fraca de contrade de la Samaria.

Filipo el batesa on ministro etiope

On àngelo del Signore el ga parlà nel fratenpo a Filipo: "Àlsate, e va verso el mesogiorno, su la strada che la va da Gerusaleme a Gaza; ela la xe deserta". Elo el se ga alzà e el se ga messo in camin, quand'eco on Etiope, on eunuco, funsionario de Candàce, regina de Etiopia, sovrintendente a tuti i so tesori, vegnù par el culto a Gerusaleme, el se ne tornava, sentà sul so caro da viajo, lesendo el profeta Isaia. El ga dito lora el Spirito a Filipo: "Va vanti, e riva a quel caro". Filipo el xe corso in vanti e, sentìo che el leseva el profeta Isaia, el ghe ga dito: "Capìssito quelo che te stè lesendo?". Quelo ghe ha risposto: "E come lo podarìa, se nissun el me istruìsse?". E el ga invità Filipo a montare e a sentarse tacà a lu. El passo de la Scritura che el stava lesendo el gera sto chì:

Come na piègora a só stà menà al masselo

e come on agnelo sensa vosse inanzi a chi lo tosa,

cussì elo no el vèrze la so boca.

Ne la so umiliassion el giudissio el ghè stà negà,

ma la so posterità chi la podarà mai descrìvarla?

Poiché xe stà tajà da la tera la so vita.

E svoltà a Filipo l'eunuco el ghe ga dito: "Te prego, de quale persona el profeta el dise sta roba? De elo istesso o de qualchedun altro?". Filipo, prinsipiàndo a parlare e scominsiàndo da quel passo de la Scritura, el ghe ga anunzià la bona novela de Gesù. Nando vanti par la strada, i xe rivà a on logo indove ghe gera aqua e l'eunuco el ga dito: "Eco chì ghè aqua; che cossa me inpedisse de èssare batesà?". El ga fato fermare el caro e i xe intrà tuti e du ne l'aqua, Filipo e l'eunuco, e elo el lo ga batesà. Quando che i xe vegnù for de l’aqua, el Spirito del Signore el ga rapìo Filipo e l'eunuco no el lo ga pi visto e elo el ga proseguìo pien de gioia el so camin. Quanto a Filipo, el se ga catà a Azoto e, nando vanti, el predicava el vangelo a tute le sità, finché el xe rivà a Cesarèa.