Capitolo 13

LA MISSION DE BARNABA E DE PAOLO

EL CONSILIO DE GERUSALEME

L'invìo in mission

Ghe gera ne la comunità de Antiochia profeti e doturi: Barnaba, Simeon soranominà Niger, Lucio de Cirène, Manaèn, conpagno d'infansia de Erode tetrarca, e Saulo. Fin che luri i stava selebrando el culto del Signore e degiunando, el Spirito Santo el ga dito: "Resservè par mi Barnaba e Saulo par l'òpara a la quale li go ciamà". Lora, dopo de gaver degiunà e pregà, i ga inposto luri le man e i li ga saludà.

L’evangelisassion de Cipro e el mago Elimas

Luri partanto, mandà dal Spirito Santo, i xe nà a Selèucia e da de chì i xe salpà verso Cipro. Rivà a Salamina i ga scuminsià a anunsiare la parola de Dio ne le sinagoghe de i Giudei, gavendo co luri anca Giovani come aiutante. Traversà tuta l'ìsola fin a Pafo, i ve ga catà on tale, mago e falso profeta giudeo, de nome Bar-Iesus, al sèguito del procònsole Sergio Paolo, persona de seno, che el gaveva fato ciamare a elo Barnaba e Saulo e el bramava de scoltare la parola de Dio. Ma Elimas, el mago, - sta roba infati vol dir el so nome – el faceva luri oposission sercando de sconsiliare el procònsole da la fede. Lora Saulo, dito anca Paolo, pien de Spirito Santo, el ga fissà i oci su de lu e el ga dito: "O omo pien de ogni frode e de ogni malissia, fiolo del diàvolo, nemico de ogni giustissia, quando te la finirè de rabaltàre le vie drite del Signore? Eco la man del Signore la xe sóra de ti: te sarè òrbo e par on serto tenpo no te vedarè el sole". De paca xe pionbà su de lu moro e tènebra, e nando de onda el sercava chi che lo menasse par man. Quando che el ga visto el fato, el procònsole el ga credù, colpìo da la dotrina del Signore.

Arivo a Antiochia de Pisidia

Salpà da Pafo, Paolo e i so conpagni i xe rivà a Perge de Panfilia. Giovani el se ga separà da luri e el xe tornà a Gerusaleme. Luri invesse nando vanti da Perge, i xe rivà a Antiochia de Pisidia e intrà ne la sinagoga nel giorno de sabo, i se ga insentà. Dopo de la letura de la Lege e de i Profeti, i capi de la sinagoga i ga mandà dire a luri: "Fradei, sa gavì qualche parola de esortassion par el pòpolo, parlè!".

La predicassion de Paolo davanti a i Giudei

Se ga alsà Paolo e fato ceno co la man el ga dito: "Òmini de Israele e voialtri timorà de Dio, scoltè. El Dio de sto pòpolo d'Israele el ga sielto i nostri pari e el ga esaltà el pòpolo durante el so esilio in tera d'Egito, e co brasso potente el li ga portà via da de là.  Pi in vanti, de dopo èssarse ciapà cura de luri par pi o manco quarant'ani nel deserto, el ga spassà via sete pòpoli nel paese de Canaan e el ga concesso a luri in eredità quele tere, par pi o manco quatrosentosinquanta ani. De dopo sto fato el ga dà a luri de i Giudici, fin al profeta Samuele. Lora luri i ga dimandà on re e Dio el dà luri Saul, fiolo de Cis, de la tribù de Beniamino, par quaranta ani. E, dopo de gaverlo remosso dal regno, el ga fato vegner fora par luri come re Davide, al quale el ga reso sta testimoniansa: A go catà Davide, fiolo de Iesse, omo secondo el me core; elo l’adenpirà tuti i me voleri.

Da la dessendensa de lu, secondo la promessa, Dio el ga tirà fora par Israele on salvadore, Gesù. Giovani el gaveva parecià la so venuda predicando on bateso de penitensa a tuto el pòpolo d'Israele. Diseva Giovani sul finir de la so mission: Mi no só quelo che voialtri pensè che mi sia! Eco, vien dopo de mi un, al quale mi no só degno de sligarghe gnanca i sàndali.

Fradei, fioli de la stirpe de Abramo, e quanti fra voialtri a sì timorà de Dio, a noialtri xe stà mandà sta parola de salvessa. I abitanti de Gerusaleme infati e i so capi no i lo ga recognossù e condanàndolo i ga adenpìo le parole de i profeti che i se lese ogni sabo; e, pur no gavendo catà in lu nissun motivo de condana a morte, i ga dimandà a Pilato che el fusse copà. Dopo de gaver conpìo tuto quanto gera stà scrito de lu, i lo ga tirà zò da la crose e i lo ga messo nel sepolcro. Ma Dio el lo ga ressussità da i morti e elo el xe aparso par na mota de giurni a queli che gera salìi co lu da la Galilea a Gerusaleme, e sti chì desso i xe i so testimoni davanti al pòpolo.

E noialtri ve anunsiemo la bona novela che la promessa fata a i pari la se ga conpìa, parché Dio el la ga atuà par noialtri, so fioli, ressussitando Gesù, come anca stà scrito nel salmo secondo:

Me fiolo te sì ti, oncó te go generà.

E che Dio lo gabia ressussità da i morti, in modo che no el gabia mai pi a tornar a la corussion, xe quanto el ga dechiarà:

Darò a voialtri le robe sante promesse a Davide, quele secure.

Par sto fato anca in on altro logo el dise:

No te parmetarè che el to santo el subissa la corussion.

Lora Davide, dopo de gaver eseguìo el volere de Dio ne la so generassion, el xe morto e el xe stà unìo a i so pari e el ga subìo la corussion. Ma quelo che Dio ga ressussità, no el ga subìo la corussion. Ve sia lora noto, fradei, che par òpara de lu ve vien nunsià la remession de i pecati e che par lu chiunque el crede el resseve giustificassion da tuto quelo dal qual no ve xe stà possìbile èssare giustificà par meso la lege de Mosè. Vardè lora che no avegna su de voialtri quelo che xe dito ne i Profeti:

Mirè, befardi,

stupì e nascondive,

parché n'òpara mi fasso a i vostri giurni,

n'òpara che no credarissi, se la ve fusse contà!".

E, fin che i nava de fora, i li pregava de parlare ancora de ste robe nel sabo drio. Siolta dopo l'assenblea, na mota de Giudei e prosèliti credenti in Dio i xe nà drio Paolo e Barnaba e luri, stando co luri, i li esortava a perseverare ne la grassia de Dio.

Paolo e Barnaba i se revolge a i pagani

El sabo drio quasi tuta la sità la se ga raunà par scoltar la parola de Dio. Quando che i ga visto quela mota de gente, i Giudei i se ga sgionfà de zelosìe e i contradiva le afermassion de Paolo, bestemando. Lora Paolo e Barnaba co franchessa i ga dechiarà:

"Gera necessario che fusse nunsià a voialtri par primi la parola de Dio, ma sicome la respengì e no ve giudichè degni de la vita eterna, eco noialtri se revolgemo a i pagani. Cussì infati ne ga ordinà el Signore:

Mi te go posto come luce par le genti,

parché ti te porti la salvessa sin a l'estremità de la tera".

Nel scoltar ste robe, i pagani i se ga ralegrà e i glorificava la parola de Dio e ga abrassà la fede tuti queli che i gera destinà a la vita eterna. La parola de Dio la se sparpajava par tuta la rejon. Ma i Giudei i ga insustà le done pie de alto rango e i notàbili de la sità e i ga fomentà na persecussion contra Paolo e Barnaba e i li ga parà via dal so teritorio. Lora luri, scorlà contra de luri la pòlvare de i pié, i xe nà a Icònio, mentre i dissèpoli i gera pieni de felìssità e de Spirito Santo.