Capìtolo 15

Controversia a Antiochia

Lora serti, vegnù da la Giudea, i insegnava a i fradei sta dotrina: "Se no ve fè sirconsìdere secondo l'usansa de Mosè, no podì èssare salvi".

Sicome Paolo e Barnaba i se oponéa del tuto e i descuteva co foga contra sti chì, se ga stabilìo che Paolo e Barnaba e serti altri de luri i nasse a Gerusaleme da i apòstoli e da i ansiani par sta question. Luri de dopo, conpagnà par on tòco de strada da la comunità, i ga traversà la Fenicia e la Samaria contando la conversion de i pagani e sussitando gran felissità in tuti i fradei. Rivà de dopo a Gerusaleme, i xe stà ressevù da la Cesa, da i apòstoli e da i ansiani e i ga referìo tuto quelo che Dio el gaveva conpìo par meso suo.

Controversia a Gerusaleme

Ma se ga alsà de le persone de la seta de i farisei, che i gera diventà credenti, e i ga sentensià: xe necessario sirconsìderli e ordinare a luri de osservare la lege de Mosè.

Lora se ga raunà i apòstoli e i ansiani par esaminare sto problema. Dopo longa discussion, Piero el se ga alzà e el ga dito:

El descorso de Piero

"Fradei, voialtri savì che desà da na mota de ani Dio el ga fato na sielta fra voialtri, parché i pagani i scoltasse par boca mia la parola del vangelo e i vegnesse a la fede. E Dio, che el cognosse i cori, el ga reso testimoniansa in so favore consedendo anca a luri el Spirito Santo, come a noialtri; e no el ga fato nissuna descriminassion fra noialtri e luri, purificàndone i cori co la fede. Or dunque, parché seitè a tentare Dio, inponendo su la cópa de i dissèpoli on dovo che né i nostri pari, né noialtri sémo stà in grado de portare? Noialtri credemo che par la grassia del Signore Gesù sémo salvà e ne l’istesso modo anca luri".

Tuta l'assenblea ga tasudo e i xe stà a scoltare Barnaba e Paolo che i referiva quanti miràculi e prodigi Dio el gaveva conpìo fra i pagani par so meso.

El descorso de Jacomo

Quando che luri i ga finìo de parlare, Jacomo el ga zontà: "Fradei, scolème. Simon ga referìo come fin da prinsipio Dio ga vossudo sìeliere tra i pagani on pòpolo par consacrarlo al so nome. Co sto fato se acorda le parole de i profeti, come stà scrito:

Dopo ste robe retornarò

e refarò la tenda de Davide che la gera cascà;

 ne repararò le ruine e la trarò sù de novo,

parché anca i altri òmini i serchi el Signore

e tute le genti su le quali xe stà invocà el me nome,

dise el Signore che el fà ste robe da lu cognossù da l'eternità.

Par sto motivo mi retegno che no se gabia da inportunàre queli che i se converte a Dio fra i pagani, ma solo che se ghe òrdini de astegnèrse da le sporcarie de i ìdoli, da la inpudicissia, da i animai sofegà e dal sangue. Mosè infati, fin da i tenpi de stiani, el ga chi che lo predicà in ogni sità, dal momento che el vien leto ogni sabo ne le sinagoghe".

La lètera apostòlica

Lora i apòstoli, i ansiani e tuta la Cesa i ga deciso de elègere de le persone fra luri e de mandarle a Antiochia insieme a Paolo e Barnaba: Juda ciamà Barsabba e Sila, òmini tegnù in granda considerassion fra i fradei. E i ga consegnà luri sta lètara: "I apòstoli e i ansiani a i fradei de Antiochia, de Siria e de Cilicia che i provien da i pagani, salute! Gavemo savudo che de le persone da parte nostra, a i quali no gavìvimo dà alcun incàrico, i xe vegnù a confòndarve co i so diecursi sconpijando i vostri ànemi. Gavemo partanto deciso tuti d'acordo de elègere de le persone e de mandarle a voialtri insieme a i nostri cari che mai Barnaba e Paolo, òmini che i ga votà la so vita al nome del nostro Signore Gesù Cristo. Gavemo mandà cussì Juda e Sila, che i ve refererà anca luri ste istesse robe a vosse. Gavemo deciso, el Spirito Santo e noialtri, de no inporve nissun altro òbligo al de fora de ste robe necessarie: astegnèrve da le carni oferte a i ìdoli, dal sangue, da i animai sofegà e da la inpudicissia. Farè roba bona partanto a vardarve da ste robe. Stè ben".

I delegà a Antiochia

Luri pi tardi, na volta congedà, i xe vegnù zò a Antiochia e raunà la comunità i ga consegnà la lètara. Quando i la ga leta, i se ga ralegrà par l'incorajamento che la infondeva. Juda e Sila, essendo anca luri profeti, i ga parlà na mota de tenpo par incorajare i fradei e i li ga fortificà. Dopo on serto tenpo i xe stà congedà co auguri de pace da i fradei, par tornare da queli che li gaveva mandà. Paolo invesse e Barnaba i xe restà a Antiochia, insegnando e nunsiando, insieme a tanti altri, la parola del Signore.

LE MISSION DE PAOLO

Paolo el se separa da Barnaba e el se agrega Sila

Dopo qualche giorno Paolo el ga dito a Barnaba: "Ritornèmo a far vìsita a i fradei in tute le sità ne le quali gavemo nunsià la parola del Signore, par vèdare come che i stà". Barnaba el voleva tore insieme anca Giovani, dito Marco, ma Paolo el retegnéa che no se dovesse tore un che el se gera alontanà da luri ne la Panfilia e no el gaveva vossudo partessipare a la so òpara. El dissenso el xe stà tale che i se ga separà l'un da l'altro; Barnaba, ciapando co elo Marco, el se ga inbarcà par Cipro. Paolo invesse el ga sielto Sila e el xe partìo, racomandà da i fradei a la grassia del Signore.

E traversando la Siria e la Cilicia, i dava nova forsa a le comunità.