Capìtolo 17

A Tessalonica. Dificoltà co i Giudei

Nando drio la via de Anfipoli e Apolonia, i xe rivà a Tessalonica, indove ghe gera na sinagoga de i Giudei. Come che gera so usansa Paolo el ve xe nà e par tri sabi el ga parlà co luri su la base de le Scriture, spiegàndole e demonstrando che el Cristo el doveva morire e ressussitare da i morti; el Cristo, el diseva, el xe quel Gesù che mi ve anunsio. Serti de luri i xe stà convinti e i ga aderìo a Paolo e a Sila, come anca on bon nùmaro de Greci credenti in Dio e no poche done de la nobiltà. Ma i Giudei, inzelosìi, i ga tirà da la so parte de i cativi che mai individui de piassa e, raunà gente, i meteva a fracasso la sità. Na volta rivà a la casa de Giasone, i sercava Paolo e Sila par menarli davanti al pòpolo. Ma no gavèndoli catà, i ga portà via Giasone e altri fradei da i capi de la sità sigando: "Quei tali che i mete el mondo sotosora i stà anca chì e Giasone el li ga ospità. Tuti sti chì i va contra i decreti de l'inperadore, afermando che ghè on altro re, Gesù". Cussì i ga messo in agitassion la popolassion e i capi de la sità che i sentiva ste robe; tutavia, dopo de gavere otegnù na caussion da Giasone e da i altri, i li ga lassà nar de longo.

Nóve dificoltà a Berea

Ma i fradei suito, durante la note, i ga fato partire Paolo e Sila verso Berèa. Rivà lì i xe intrà ne la sinagoga de i Giudei. Luri i gera de sintimenti pi nòbili de queli de Tessalonica e i ga acetà la parola co gran entusiasmo, esaminando ogni giorno le Scriture par vèdare se le robe le stava davero cussì. Na mota de luri i ga credù e anca de le done greche de la nobiltà e no puchi òmini. Ma quando i Giudei de Tessalonica i xe vegnù a savère che anca a Berèa gera stà nunzià da Paolo la parola de Dio, i xe nà là a sconbussolare e a sobilare el pòpolo. Lora i fradei i ga fato partire suito Paolo par la strada verso el mare, mentre Sila e Timòteo i xe restà in sità. Quei che i scortava Paolo i lo ga conpagnà fin a Atene e i se ne xe ripartìi co l'òrdine par Sila e Timòteo de ragiùngerlo al pi presto.

Paolo a Atene

Fin che Paolo el li spetava a Atene, el freméa nel so spìrito al vèdare la sità inpienà de ìdoli. El descuteva fratanto ne la sinagoga co i Giudei e i pagani credenti in Dio e ogni giorno su la piassa prinsipale co queli che el incrosava par strada. Anca serti filòsofi epicurei e stòici i descuteva co lu e serti i diseva: "Che cossa voralo mai insegnare sto ciarlatan?". E altri: "Someja èssare on anunsiatore de divinità foreste"; dal momento che el anunsiava Gesù e la ressuression. Ciapà elo co luri, i lo ga menà su l'Areòpago e i ga dito: "Podemo dunque savère qual la xe sta nova dotrina predicà da ti? Robe  stranbe par davero te ne miti ne le rece; desiderèmo lora cognòssare de che cossa se trata". Tuti i Ateniesi infati e i foresti là residenti no i gaveva passatenpo pi gradìo che parlare e sentir parlare.

Descorso de Paolo davanti a l'Areopago

Lora Paolo, alsà in pié in meso a l'Areòpago, el ga dito:

"Sitadini ateniesi, vedo che in tuto a sì na mota timorà de i dèi. Passando infati e osservando i monuminti del vostro culto, a go catà anca n'ara co l'iscrission: Al Dio ignoto. Quelo che voiatri adoré sensa cognòssare, mi ve lo anunsio. El Dio che ga fato el mondo e tuto quelo che el contien, che el xe signore del sielo e de la tera, no el stà in tenpli construìi da le man de l'omo né da le man de l'omo el se lassa servire come se el gavesse bisogno de calcossa, essendo lu che el dà a tuti la vita e el respiro e ogni roba. Elo el ga creà da un solo tute le nassion de i òmini, parché i abitasse su tuta la facia de la tera. Par luri el ga stabilìo l'òrdine de i tenpi e i confini del so spassio, parché i sercasse Dio, se mai i rivi a catarlo nando come a gatomagnao, benché no el sia lontan da ciascedun de noialtri. In lu infati vivemo, se movemo e esistemo, come anca serti de i vostri poeti i ga dito:

Poiché de elo stirpe noialtri sémo.

Essendo noialtri lora stirpe de Dio, no dovemo pensare che la divinità la sia conpagna a l'òro, a l'argento e a la piera, che ga l'inpronta de l'arte e de l'imaginassion umana. Dopo èssare passà sóra a i tenpi de l'ignoransa, desso Dio òrdina a tuti i òmini de tuti i loghi de ravedèrse, parché elo el ga stabilìo on giorno nel quale el dovarà giudicare la tera co giustissia par meso de on omo che elo el ga designà, dàndone a tuti prova secura col ressussitarlo da i morti".

Quando che i ga sentìo parlare de ressuression de i morti, serti i ghe ga fato la baja, altri i ga dito: "Te scoltaremo su sto argomento n'altra volta". Cussì Paolo el xe na via da quela riunion. Ma serti i ga aderìo a lu e i xe deventà credenti, fra luri anca Dionigi menbro de l'Areòpago, na dòna de nome Dàmaris e altri co luri.