Capìtolo 18

Fondassion de la Cesa de Corinto

Dopo sti fati Paolo el xe nà via da Atene e el xe nà a Corinto. Chì el ga catà on Giudeo ciamà Aquila, oriundo del Ponto, rivà poco vanti da l'Italia co la mojer Prisila, in sèguito a l'òdine de Claudio che el parava via da Roma tuti i Giudei. Paolo el xe nà da luri e sicome i faseva l’istesso  mestiere, el se ga stabilìo ne la so casa e el lavorava. I gera infati de mestiere fabricaduri de tende. Ogni sabo anca i descuteva ne la sinagoga e i sercava de persuadère Giudei e Greci.

Quando che i xe rivà da la Macedonia Sila e Timòteo, Paolo el se ga dedicà ànema e corpo a la predicassion, afermando davanti a i Giudei che Gesù el gera el Cristo. Ma sicome luri i se ghe oponéa e i bestemava, scorlàndose i vestiti, el ga dito: "El vostro sangue el caschi su la vostra testa: mi a só inossente; da desso in vanti narò da i pagani". E nà via da de là, el xe intrà ne la casa de on tale ciamà Tizio Giusto, che l’onorava Dio, la so abitassion la gera tacà a la sinagoga. Crispo, capo de la sinagoga, el ga credù nel Signore insieme a tuta la so fameja; e anca na mota de i Corinzi, scoltando Paolo,  i credeva e i se faseva  batesare.

E na notte in vision el Signore el ga dito a Paolo: "No gaver paura, ma seita a parlare e no tasère, parché ni a só co ti e nissun el sercarà de farte del male, parché mi a go on pòpolo numaroso in sta sità". Cussì Paolo el se ga fermà on ano e meso, insegnando fra luri la parola de Dio.

Paolo portà in tribunale da i Giudei

Quando che gera procònsole de l'Acaia Galione, i Giudei i xe insorti in massa contra Paolo e i lo ga portà al tribunale disendo: "Sto chì el convise la gente a rèndare on culto a Dio in modo contrario a la lege". Paolo el stava par respòndare, ma Galione el ga dito a i Giudei: "Se se tratasse de on delito o de na assion cativa, o Giudei, mi ve scoltarìa, come de ragione. Ma se le xe question de parole o de nomi o de la vostra lege, vedìvela voialtri; mi no vojo èssare giùdice de ste facende". E el li ga fati nar via dal tribunale. Lora tuti i ga ciapà Sòstene, capo de la sinagoga, e i lo ga bastonà davanti al tribunale ma Galione no el se curava par gnente de tuto sto mis-mas.

Retorno a Antiochia e partensa par el terso viajo

Paolo el xe restà ancora svarià giurni, de dopo el ga fato comiato co i fradei e el se ga inbarcà direto in Siria, in conpagnia de Prisila e Aquila. A Cencre el se ga fato tajare i caveji a causa de on voto che el gaveva fato. I xe rivà a Efeso, indove el ga lassà i du spusi, e intrà ne la sinagoga el se ga messo a descùtare co i Giudei. Luri i lo ga pregà de fermarse pi tenpo, ma no el xe stà d’acordo. Tutavia el ga ciapà comiato disendo: "Ritornarò de nóvo da voialtri, se Dio lo vorà", de dopo el xe partìo da Efeso.  Rivà a Cesarèa, el xe nà a saludare la Cesa de Gerusaleme e de dopo el xe nà a Antiochia.

Passà là on fià de tenpo, el xe partìo de nóvo traversando drio fila le rejon de la Galazia e de la Frigia, confermando ne la fede tuti i dissèpoli.

Apolo

Xe rivà a Efeso on Giudeo, ciamà Apolo, nativo de Alessandria, omo studià, parecià ne le Scriture. Elo el gera stà amaestrà ne la via del Signore e pien de farvore el parlava e l’insegnava esatamente quelo che se referiva a Gesù, siben el cognosèsse solo el bateso de Giovani. Elo intanto el ga scominsià a parlare ciaramente ne la sinagoga. Prisila e Aquila i lo ga scoltà, de dopo i lo ha ciapà co luri e i ghe ga spiegà co pi granda acuratessa la via de Dio. Sicome elo el bramava passare ne l'Acaia, i fradei i lo ga incorajà e i ga scrito a i dissèpoli de farghe bona acoliensa. Rivà là, el xe sta na mota ùtile a queli che par òpara de la grassa i gera diventà credenti; el confutava infati co ardore i Giudei, demonstrando publicamente co le Scriture che Gesù el xe el Cristo.