Capìtolo 22

Aringa di Paolo a i Giudei de Gerusaleme

"Fradei e pari, scoltè la me difesa davanti a voialtri". Quando che i ga sentìo che el parlava a luri in lengua ebràica, i ga fato silensio ancor de pi. E elo el ga seità: "Mi a só on Giudeo, nato a Tarso de Cilicia, ma cressù in sta sità, formà a la scola de Gamaliele ne le pi rìgide norme de la lege paterna, pien de zelo par Dio, conpagno de come a sì tuti voialtri. Mi a go perseguità a morte sta nova dotrina, arestando e trando in preson òmini e done, come pole darme testimoniansa el somo sacerdote e tuto el colegio de i ansiani. Da luri a go ciapà lètare par i nostri fradei de Damasco e a só partìo par portar anca  queli de là come presonieri a Gerusaleme, par èssare punìi.

Fin ca gero in viajo e me stavo avissinando a Damasco, verso mesogiorno, de paca na gran luce dal sielo la ga slusegà torno de mi; a só cascà par tera e a go sentìo na vosse che la me diseva: “Saulo, Saulo, parché te me persèguiti?” Go resposto: “Chi sito, o Signore?” El me ga dito: “Mi a só Gesù el Nazareno, che ti te persèguiti”. Queli che i gera co mi i ga visto la luce, ma no i ga sentìo quelo che me parlava. Mi a go dito lora: “Cossa gonti da fare, Signore?” E el Signore el me ga dito: “Àlsate e va verso Damasco; là te sarè informà de tuto quelo che xe stabilìo che ti te fassi”. E sicome mi no ghe vedevo pi, a causa del fulgore de quela luce, guidà par man da i me conpagni, a só rivà a Damasco.

On serto Anania, on devoto osservante de la lege e in bona reputassion presso tuti i Giudei là residenti, el xe vegnù da mi, el me xe vegnù tacà e el ga dito: “Saulo, fradelo, torna a vèdare!” E in quel istante mi a go vardà verso de lu e a go riciapà la vista. Elo el ga zontà: “El Dio de i nostri pari el te ga predestinà a cognòssare la so volontà, a vèdare el Giusto e a scoltare na parola da la so istessa boca, parché te ghe sarè da testimone davanti a tuti i òmini de le robe che te ghè visto e sentìo. E desso parché te speti? Àlsate, ciàpate el bateso e làvate da i to pecati, invocando el so nome”.

De dopo el me ritorno a Gerusaleme, fin ca pregavo nel tempio, a só stà rapìo in èstasi e a go visto Lu che el me diseva: Fà in pressa e va fora da Gerusaleme, parché no i acetarà la to testimoniansa su de mi. E mi a go dito: Signore, luri i sà che fasevo inpresonare e bastonare ne la sinagoga queli che i credeva in ti; quando se spandeva el sangue de Stefano, to testimone, anca mi a gero presente e aprovavo e tegnevo de ocio i vestiti de queli che i lo stava copando. Lora el me ga dito: Va, parché mi te mandarò distante, fra i pagani".

Paolo, sitadin roman

Fin a ste parole i gera stà a scoltarlo, ma a on serto punto i ga alsà la vosse sbecando: "Falo fora; no el ga pi da vìvare!". E sicome i seitava a sigare, a trar via i tabari e a trar pòlvare par aria, el tribuno el ga ordinà de portarlo ne la fortessa, prescrivendo de interogarlo a colpi de flagelo al fin de savère par qual motivo i ghe sigava contra in quel  modo.

Ma quando che i lo ga ligà co le séngie, Paolo el ga dito al senturion che el ghe stava tacà: "Podìo voialtri flagelare on sitadin romano, no ancor giudicà?". Sentìa sta roba, el senturion el ga corso a dirlo al tribuno: "Cossa steto par fare? Quel omo el xe on romano!". Lora el tribuno el xe nà da Paolo e el ghe ha dimandà: "Dime, sito ti on sitadin romano?". El ga resposto: "Si". Ga replicà el tribuno: "Mi sta citadinansa la go conprà a caro presso". Paolo el ga dito: "Mi, invesse, lo só de nàssita!". E suito se ga alontanà da lu queli che i doveva interogarlo. Anca el tribuno el ga vudo spagheto, rendèndose conto che Paolo el gera on sitadin romano e che lu el lo gaveva messo in cadene.

Conparsa davanti al sinedrio

El giorno drio, volendo cognòssare la realtà de i fati, sarìa come dir el motivo par el qual el vegnéa acusà da i Giudei, el ghe ga fato tor via le cadene e el ga ordinà che se raunasse i somi sacerdoti e tuto el sinedrio; el ve ga fato portare Paolo e el lo ga presentà davanti a luri.