Capìtolo 25

Paolo el se apela a Cesare

Festo lora, rivà ne la provinsia, tri giurni dopo el xe salìo da Cesarèa a Gerusaleme. I somi sacerdoti e i capi de i Giudei i se ghe ga presentà par acusare Paolo e i sercava  de convìnserlo, dimandando come on favore, in odio a Paolo, che el lo fasesse vegnère a Gerusaleme; e intanto i pareciava na tràpola par coparlo longo la strada. Festo el ga resposto che Paolo el stava sóto custodia a Cesarèa e che elo istesso el sarìa partìo fra poco. "Queli lora che i ga autorità fra voialtri, el ga dito, i vegna co mi e se ve sarà qualche colpa in quel omo, i lo denunsi".

Dopo de èssarse trategnù fra luri no pi de oto o diese giurni, el xe nà a Cesarèa e el giorno drio, stando sentà in tribunale, el ga ordinà che ghe fusse portà Paolo. Pena el xe rivà, i lo ga sircondà i Giudei vegnù da Gerusaleme, inputàndoghe na mota de colpe gravi, sensa parò fàrghela a provarle. Paolo a so difesa el ga dito: "No go comesso nissuna colpa, né contra la lege de i Giudei, né contra el tenpio, né contra Cesare". Ma Festo volendo fare on favore a i Giudei, el se ga svoltà a Paolo e el ga dito: "Vuto mare a Gerusaleme par èssare là judicà de ste robe, davanti a mi?". Paolo el ga resposto: "Me cato de fronte al tribunale de Cesare, chì mi a go da èssare judicà. A i Giudei no go fato alcun torto, come anca ti te sè pi che ben. Se lora a só in colpa e a go comesso qualche roba che la meriti la morte, no rifiuto de morire; ma se ne le acuse de sti chì no ghè gnente de vèro, nissun el ga el podere de consegnarme a luri. Mi me apelo a Cesare". Lora Festo, dopo de gavere conferìo col consilio, el ga resposto: "Te te sì apelà a Cesare, a Cesare te narè".

Paolo el conpare de fronte al re Agripa

Gera passà na sbrancà de giurni, quando che xe rivà a Cesarèa el re Agripa e Berenìce, par saludare Festo. E sicome i se ga trategnù bastansa giurni, Festo el ga esposto al re el caso de Paolo: "Ghè on uomo, lassà chì presoniero da Felice, contra el quale, durante la me vìsita a Gerusaleme, se ga presentà co acuse i somi sacerdoti e i ansiani de i Giudei par reclamarne la condana. A go resposto che i Romani no i usa consegnare na persona, prima che l'acusà el sia stà messo a confronto co i so acusaduri e el possa gaver modo de difènderse da l'acusa. Lora luri i xe vegnù chì e mi sensa esitassion el giorno drio me go sentà in tribunale e a go ordinà che ve fusse portà quel omo. I acusaduri i se ga fato sóto, ma no i ga portà nissuna de le inputassion criminose che mi me spetava; i gaveva solo co lu de le question relative la so particolare relijon e reguardanti on serto Gesù, morto, che Paolo el sostegneva èssare ancor in vita. Perplesso de fronte a sìmili controversie, ghe go dimandà se el voleva nare a Gerusaleme e èssare giudicà là de ste robe. Ma Paolo el se ga apelà perché la so causa la fusse resservà al giudissio de l'inperadore, e cussì a go ordinà che el vegnesse tegnù sóto custodia fin a quando podarò inviarlo a Cesare". E Agrippa a Festo: "Vurìa anca mi scoltare quel omo!". "Doman, el ga resposto, te lo podarè scoltare".

El giorno drio, Agripa e Berenìce i xe rivà co gran ponpa e i xe intrà nel salon de l'udiensa, conpagnà da i tribuni e da i sitadini pi in vista; par òrdine de Festo xe stà fato intrare anca Paolo. Lora Festo el ga dito: "Re Agripa e sitadini tuti chì presenti co noialtri, voialtri gavì de fronte a i oci quelo sul conto del quale tuto el pòpolo de i Giudei el se ga apelà a mi, in Gerusaleme e chì, par dimandare a gran vosse che no el resti pi in vita. Mi parò me go convinto che elo no el ga fato alcuna roba meritèvole de morte e essèndose apelà a l'inperadore a go deciso di farlo nare. Ma sul so conto no go gnente de preciso da scrìvare al sovrano; par sto motivo lo go fato portare davanti a voialtri e soratuto davanti a ti, o re Agripa, par gavere, de dopo sta udienza, calcossa da scrìvare. Me pare insensà infati mandare on presoniero, sensa dire le acuse che se move contra de lu".