Capìtolo 26

Descorso de Paolo davanti al re Agripa

Agripa el ga dito a Paolo: "Te xe concesso de parlare a to difesa". Lora Paolo, slongà la man, el se ga defeso cussì: "Me rèputo fortunà, o re Agripa, de poderme descolpare da tute le acuse de le quali a só incriminà da i Giudei, oncó chì  de fronte a ti, che te cognossi a la perfession tute le usanse e question reguardanti i Giudei. Partanto te prego de scoltarme co passiensa. La me vita fin da la me giovinessa, vissuda fra el me pòpolo e a Gerusaleme, i la cognosse tuti i Giudei; luri i sà anca da tenpo, se i vole rèndarne testimoniansa, che, come fariseo, a só vissù ne la seta pi rìgida de la nostra relijon. E desso me cato sóto processo a causa de la speransa ne la promessa fata da Dio a i nostri pari, e che le nostre dódese tribù le spera de vèdare conpìa, servendo Dio note e giorno co perseveransa. De sta speransa, o re, a só desso incolpà da i Giudei! Parché xe considerà inconsepìbile fra de voiatri che Dio el ressùssiti i morti?

Anca mi credevo on tenpo me dovere de lavorare ativamente contra el nome de Gesù el Nazareno, come in realtà a go fato a Gerusaleme; na mota de fedeli a li go sarà in preson co l'autorisassion gavuda da i somi sacerdoti e, quando i vegneva condanà a morte, anca mi a go votà contra de luri. In tute le sinagoghe sercavo de costrènzerli co le torture a bestemare e, infuriando a pi no se pole contra de luri, davo luri la cacia fin ne le sità straniere.

In serte sircostanse, fin ca stavo nando a Damasco co autorisassion e pieni poderi da parte de i somi sacerdoti, verso mesogiorno a go visto su la strada, o re, na luce dal sielo, pi slusegante del sole, che la ga avolto mi e i me conpagni de viajo. Tuti sèmo cascà par tera e mi a go sentìo dal sielo na vosse che la me diseva in ebraico: Saulo, Saulo, parché te me persèguiti? Duro el xe par ti scalsiare contra el guièlo. E mi a go dito: Chi sito, o Signore? E el Signore el ga resposto: Mi a só Gesù, che ti te  persèguiti. Sù, àlsate e remètete in pié; a te só aparso infati par costituirte ministro e testimone de quele robe che te ghè visto e de quele par le quali te aparirò ancora. Par sto motivo te libararò dal pòpolo e da i pagani, a i quali te mando a vèrzare luri i oci, parché i passi da le tènebre a la luce e dal podere de sàtana a Dio e i otegna la remission de i pecati e l'eredità in meso a queli che i xe stà santificà par la fede in mi.

Partanto, o re Agripa, mi no go disobedìo a la vision seleste; ma prima a queli de Damasco, de dopo a queli de Gerusaleme e in tuta la rejon de la Giudea e infin a i pagani, predicavo de convertirse e de revòlgerse a Dio, conportàndose in manera degna de la conversion. Par ste robe i Giudei i me ga assaltà nel tenpio e i ga tentà de coparme. Ma l'aiuto de Dio el me ga assistìo fin a sto giorno, e posso ancor rèndare testimonianza a i ùmili e a i grandi. Gnent'altro mi afermo se no quelo che i profeti e Mosè i ga dechiarà che doveva capitare, che sarìa a dir che el Cristo el sarìa morto, e che, primo fra i risorti da morte, el gavarìa anunzià la luce al pòpolo e a i pagani".

Reassion de l'uditorio

Fintantoché elo el parlava cussì in so difesa, Festo a gran vosse el ga dito: "Ti te sì mato, Paolo; la massa siensa la te ga dà al sarvèlo!". E Paolo: "No só passo, el ga dito, ecelente che mai Festo, ma stò disendo parole vère e sage. El re el xe al corente de ste robe e davanti a lu parlo co franchessa. Penso che gnente de ste robe el ghe sia scognossù, parché no i xe fati capità in secreto. Crìdito, o re Agripa, ne i profeti? Sò che te ghe credi". E Agripa a Paolo: "Par poco no te me convinsi a farme cristian!" E Paolo: "Par poco o par tanto, mi vurìa suplicare Dio che no solo ti, ma quanti oncó i me scolta  i deventasse cussì conpagno ca a só mi, salvo ste cadene!".

Se ga alsà lora el re e co lu el governadore, Berenìce, e queli che i gaveva ciapà parte a la seduta e nà tacà i conversava insieme e i diseva: "Sto omo no el ga fato gnente che mèriti la morte o le cadene". E Agripa el ga dito a Festo: "Sto chì el podeva èssare messo in libartà, se no el se fusse apelà a Cesare".