Capìtolo 1

Da Gesù a i apòstoli

Nel me primo libro desà a go tratà, caro Teofilo, de tuto quelo che Gesù el ga fato e insegnà dal prinsipio fin al giorno nel qual, dopo de gaver dà instrussion a i apòstoli che el se gaveva sielto nel Spirito Santo, el xe stà assunto in sielo.

Elo el se ghe ga monstrà vivo, de de dopo la so passion, co na mota de prove, aparèndoghe par quaranta giurni e parlàndoghe de Dio. Fintanto che el se catava a tòla co luri, el ghe ga ordinà de no nar lontan da Gerusaleme, ma de spetar che se adenpisse la promessa del Pare "chela, el ga dito, che voialtri gavì scoltà da mi: Giovani el me ga batesà co aqua, voialtri, viceversa, sarì batesà nel Spirito Santo, fra no massa dì".

L'assension

Cussita, vegnù a catarse arente, i ghe ga dimandà: "Signore, zelo sto chì el tenpo nel qual te tirarè sù el regno de Israele?" Ma elo el ga risposto: "No speta a mi cognòssare i tenpi e i mominti che el Pare el ga resservà a la so sielta, ma gavarì forsa dal Spirito Santo che el se calarà dessora voialtri e voialtri me sarì da testimoni a Gerusaleme, in tuta la Giudea e la Samaria e fin a i pi distanti confini de la tera".

Dite ste robe, el xe stà elevà in alto sóto i oci de luri e na nùvola la lo ga sconto a la so vista. E sicome luri i stava fissando el sielo quando che elo el se ne nava de longo, eco du òmini co vestiti bianchi che i se ga presentà e i ga dito: "Òmini de Galilea, parché stè a vardare in sielo? Sto Gesù, che el xe stà, da de de meso de voialtri assunto fin al sielo, el tornarà on dì propio conpagno de come ca lo gavì visto nar in sielo".

Lora i xe tornà a Gerusaleme dal monte dito de i Ulivi, che el xe arente a Gerusaleme quanto el caminar xe parmesso de on sabo. Intrà in sità i xe nà al pian dessora nel qual i vivéa. Ghe gera Piero e Giovani, Jàcomo e Andrea, Filipo e Tomaso, Bàrtolo e Matìo, Jàcomo de Alfeo e Simon lo Zelota e Juda de Jàcomo. Tuti sti chì i gera zelanti e concordi ne le orassion, in conpagnia de on par de done e de Maria, la mare de Gesù e co i fradei de elo.

LA CESA DE GERUSALEME

La sostitussion de Juda

In quei giurni Piero mèssose in pié el se ga messo in meso a i fradei (el nùmaro de le persone raunà el gera pi o manco de sentovinti) e el ga dito: "Fradei, bisognava che maurasse quelo che ne la Scritura gera stà predito dal Spirito Santo par boca de Davide reguardo a Juda, che el ga fato da guida a quei che i ga inpresonà Gesù. Elo el gera stà del nostro nùmaro e el gavéa vudo in sorte l’istesso nostro ministero. Juda el ga conprà on tòco de tera co i schei ciapà dal so delito e de dopo nando de rugolon in vanti el se ga squartà in do e se ga sparpajà dapartuto le so buele. Sta roba la xe diventà cussì tanto cognosssù a tuti i abitanti de Gerusaleme, che quel teren el xe stà ciamà ne la so lengua Akeldamà, vale a dir Canpo de sangue. Infati stà scrito nel libro de i Salmi:

La so casa la diventi voda,

e nissun el la viva,

la so mansion la ciapi on altro.

Bison lora che tra quei che i ne xe stà conpagni par tuto el tenpo nel qual el Signore Gesù el ga vissudo in meso a noialtri, prinsipiando dal bateso de Giovani fin al dì nel qual el xe stà da de meso de noialtri tirà sù in sielo, un el diventi, stando co noialtri, testimone de la so ressuression".

Se ga fato vanti  du, Bepi dito Barsaba, che el gera soranominà Justo, e Matia. Lora luri i ga pregà disendo: "Ti, Signore, che te cognossi el core de tuti, mòstrane quale de sti du te ghè designà a ciapare el posto in sto ministero e apostolato che Juda el ga abandonà par nàrsene nel posto da lu sielto". De dopo i ga sortejà su i du e la sorte la xe finìa su Matia, che el xe stà zontà a i óndese apòstoli.