Capìtolo 3

La guarijon del sturpio

On giorno Piero e Giovani i xe nà sù al tenpio par la preghiera verso le tre del dopodisnà. Chì de sòlito vegnéa portà on omo, sturpio fin da la nàssita e i lo metéa ogni giorno arente la porta del tenpio dita "Bela" a dimandar la carità a quei che i intrava nel tenpio. Sto omo, vedendo Piero e Giovani che i stava par intrar nel tenpio, el ghe ga dimandà la carità. Lora Piero el ga fissà i oci su de elo come che ga fato anca Giovani e el ga dito: "Vàrda in diression de noialtri". Elo el se ga svoltà verso de luri, spetàndose de ciapàrse calcossa. Ma Piero el ghe ga dito: "No go né argento né òro, ma quelo ca go te lo dò: nel nome de Gesù Cristo, el Nazareno, camìna!". E, ciapà par la man drita, el lo ga tirà sù. De bota i so pié e le caicie le ga ciapà forsa e saltà in pié el ga scuminsià a caminare; e el xe intrà co luri nel tenpio caminando, saltando e lodando Dio. Tuto el pòpolo el lo ga visto caminare e lodare Dio e i recognosséa che el gera quelo che el se sentava a dimandar la carità a la porta Bela del tenpio e i gera maravejà e intontonìi par quelo che ghe gera capità.

Descorso de Piero al pòpolo

Quando che elo el se tignèa tacà a Piero e a Giovani, tuto el pòpolo for de elo par la maraveja el ga corso verso de luri al pòrtego dito de Salomone. Nel vèdare sta roba, Piero el ga dito al pòpolo: "Òmini d'Israele, parché ve maravejè de sto fato e seitè a puntarne de ocio come se par nostro podere e nostra pietà a gavìssimo fato caminare sto omo? El Dio de Abramo, de Isaco e de Giacobe, el Dio de i nostri pari el ga glorificà el so servo Gesù, che voialtri a gavì dà e renegà de fronte a Pilato, propio quando che elo el gavéa deciso de libararlo; voialtri de contra a gavì renegà el Santo e el Justo, a gavì dimandà che ve fusse grassià on sassin e gavì copà l'autore de la vita. Ma Dio el lo ga ressussità da i morti e de sta roba noialtri a sémo testimoni. Propio par la fede reposta in elo el nome de Gesù ga dà forsa a sto omo che voialtri vedì e cognossì; la fede in elo la ga dà a sto omo la òtima guarijon al cospeto de tuti voialtri.

Desso, fradei, mi sò che voialtri a gavì oparà par ignoransa, cussì come i vostri capi; Dio parò el ga adenpìo in sta manera quelo che el gavéa nunzià par boca de tuti i profeti, vale a dir che el so Cristo el sarìa morto. Pentìve partanto e canbiè vita, parché sia scancelà i vostri pecati e cussì possa rivare i tenpi de la consolassion da parte del Signore e elo el mandi quelo che el ve gavéa  destinà come Messia, vale a dir Gesù. Elo el ga da èssare ressevù in sielo fin a i tenpi de la restaurassion de tute le robe, come che el ga dito Dio fin da i tenpi de stiani, par boca de i so santi profeti. Mosè infati el ga dito: El Signore vostro Dio el farà levare par voialtri on profeta conpagno de mi in meso a i vostri fradei; voialtri lo scoltarè in tuto quelo che elo el ve dirà. E chiunque no el scoltarà quel profeta, el sarà cava via da de meso el pòpolo. Tuti i profeti, a scominsiare da Samuele e da quanti i ga parlà de dopo, i ga nunzià sti giurni.

Voialtri a sì i fioi de i profeti e de l'aleansa che Dio el ga stabilìo co i vostri pari, quando che el ga dito a Abramo: Ne la to dissendènsa sarà benedìe tute le fameje de la tera. Dio, dopo de gaver ressussità el so servo, el lo ga mandà par primo a voialtri par portave la benedission e parché ciascedun el se converta da  le so iniquità".