Capìtolo 11

A Gerusaleme, Piero el giustìfica la so condota

I apòstoli e i fradei che i stava ne la Giudea i xe vegnù a savère che anca i pagani i gaveva ciapà la parola de Dio. E quando che Piero el xe nà a Gerusaleme, i sirconsisi i lo ga bravà disendo: "Ti sì intrà in casa de òmini no sirconsisi e te ghè magnà insieme co luri!".

Lora Piero el ga contà par òrdine come che gera nà le robe, disendo: "Mi me catavo in preghiera ne la sità de Giafa e a go visto in èstasi na vision: na roba, conpagna a on gran mantìle, che la vegnéa zò come calà dal sielo par le quatro coche e el xe rivà fin a mi. Fissàndolo co atension, a go visto in elo quadrùpedi, fiere e rètili de la tera e osei del sielo. E a go sentìo na vosse che la me diseva: Piero, àlzate, copa e magna! A go risposto: No sia mai, Signore, dal momento che gnente de profano e de imondo el xe intrà zamè ne la me boca. Ga ribatù de novo la vosse dal sielo: Quelo che Dio ga purificà, ti no consideràrlo profano. Sto fato el xe avegnù par tre volte e de dopo tuto xe stà ressolevà de novo nel sielo. E eco, in quel istante, tri òmini rivare a la casa indove stàvimo, mandà da Cesarèa a sercarme. El Spirito el me ga dito de nare co luri sensa lagne. Xe vegnù co mi anca sti sié fradei e sémo intrà in casa de quel omo. Elo el ne ga contà che el gaveva visto on àngelo presentarse in casa sua e el ghe ga dito: Manda a Giafa e fà vegnere Simon dito anca Piero; elo el te dirà parole par meso de le quali te sarè salvà ti e tuta la to fameja. Gavevo pena scominsià a parlare quando el Spirito Santo el xe nà su de luri, conpagno in prinsipio el gera vegnù su de noialtri. Me só mensonà lora de quela parola del Signore che la diseva: Giovani el ga batesà co aqua, voialtri invesse sarì batesà in Spirito Santo. Se lora Dio el ga dà a luri l’istesso dóno che a noialtri par gavere credù nel Signore Gesù Cristo, chi gero mi par tegner bota a Dio?".

Al scoltar ste robe i se ga chietà e i ga scominsià a glorificare Dio disendo: "Lora anca a i pagani Dio ga concesso che i se converta parché i gabia la vita!".

Fondassion de la Cesa de Antiochia

Intanto queli che i gera stà despersi de dopo la persecussion s-ciopà al tenpo de Stefano, i gera rivà fin ne la Fenicia, a Cipro e a Antiochia e no i predicava la parola a nissun salvo che a i Giudei. Ma pi de calchedun fra luri, sitadini de Cipro e de Cirène, rivà a Antiochia, i ga scominsià a parlare anca a i Greci, predicando la bona novela del Signore Gesù. E la man del Signore la gera co luri e cussì on gran nùmaro el ga credù e el se ga convertìo al Signore. La notissia la xe rivà a le rece de la Cesa de Gerusaleme, la quale la ga mandà Barnaba a Antiochia.

Quando che sto chì el xe rivà e el ga visto la grassia del Signore, el se ga ralegrà e, da omo virtuoso quale el gera e pien de Spirito Santo e de fede, l’incorajava tuti a perseverare co core franco nel Signore. E na mota de gente la xe stà portà al Signore. Barnaba de dopo el xe partìo a la volta de Tarso par sercare Saulo e catà el lo ga menà a Antiochia. I xe restà insieme on ano intiero in quela comunità e i ga instruìo na fraca de gente; a Antiochia par la prima volta i dissèpoli i xe stà ciamà Cristiani.

Barnaba e Saulo a Gerusaleme

In sto tenpo serti profeti i gera vegnù a Antiochia da Gerusaleme. E un de luri, de nome Agabo, na volta mèssose in pié, el ga nunzià par inpulso de el Spirito che sarìa s-ciopà na bruta carestia su tuta la tera. Sta roba de fato la xe avegnù sóto l'inpero de Claudio. Lora i dissèpoli i se ga acordà, ciaschedun a seconda de quelo che el gaveva, de mandare on socorso a i fradei abitanti ne la Giudea; sta roba la xe stà fata, mandàndola a i ansiani, par meso de Barnaba e Saulo.