GIA.

Oe, ghe xe de le done. (ad Andreetta)

AND.

Zito, che le ghe staga. (a Giacometto)

LEL.

Vi son donne là dentro. (ad Ottavio)

OTT.

Davvero? Oh questa è vaga!

FEL.

Cossa gh'è? coss'è stà? Se vede a bulegar.

Per diana, le xe done che ne vien a spionar.

GIA.

Oe, la xe la Contessa.

AND.

Ghe xe un'altra con ela;

Che la sia to muggier?

GIA.

La sarave ben bela;

La xe montada in barca; l'ho vista mi a montar.

No crederia che ancuo la volesse tornar. (si vedono a muovere le portiere)

FEL.

La xe longa sta istoria. Dove xe sior Lunardo?

Ste done per adesso le ha abù qualche riguardo;

No le pol star in stropa, le vol vegnir de filo.

Adesso no se varda più tanto per sutilo.

El disnar xe fenio, podemo levar su.

Vorle vegnir a rider? Rideremo anca nu. (tutti s'alzano, e partono le parti mute)

GIA.

Bravo, Felippo, bravo.

AND.

Bravo da galantomo.

FEL.

Cossa credeu, patroni? Anca mi son un omo.

Benché son in ti ani, me piase l'alegria,

E me vôi devertir al par de chi se sia.

S'aveva dito: a tola done no ghe sarà.

S'ha mantegnù l'impegno, e no ghe ne xe stà.

Adesso sta pramatica l'ha avù el so compimento;

S'avemo da inventar qualche devertimento.

Parlerò con Lunardo, aspetè qua un tantin;

Vôi che se devertimo, vôi che femo un festin;

Vôi co ste Zuecchine che femo i generosi;

Vôi che i diga a Venezia che semo i morbinosi. (parte)

GIA.

Mi ghe stago.

AND.

Anca mi.

OTT.

Anch'io non mi ritiro.

FEL.

(A servir la Contessa unicamente aspiro). (da sé)

GIA.

Mo via, care patrone, no le fazza babao;

Che le vegna con nu. Le scampa da recao?

LEL.

Queste belle signore patiscono i rossori.

Anderò io da loro, servo di lor signori. (entra dov'è Brigida)

OTT.

(Non lo lascio di vista il caro amico mio;

S'ei si vuol divertire, vo' divertirmi anch'io). (parte dietro Lelio)

AND.

Lori va per de là; nu andémo per de qua;

Anca per nualtri do qualcossa ghe sarà. (parte)

GIA.

Za che no gh'è Tonina, me togo boniman.

Vôi balar, vôi saltar, magari fin doman. (parte)