ANZ.

Oe, no savè? Sta sera i vuol far un festin.

CAT.

Baleremio anca nu?

ANZ.

Pol darse un pochetin.

BET.

I darà anca da cena.

ANZ.

Sì, ma nu no gh'intremo.

BET.

Quando che i dà da cena, qualcossa magneremo.

CAT.

Mi me basta balar.

ANZ.

E mi gh'ho el mio dileto

A véder a fenir un certo negozieto.

Quella certa signora, che no se sa chi sia,

I dise che la sposa un de sta compagnia.

Mi me par impussibile; ghe vederemo el fin.

CAT.

Donca per le so nozze i farà sto festin.

ANZ.

Pol esser.

BET.

Sì, seguro, e co ghe xe novizzi,

No ghe mancherà certo né torte, né pastizzi.