SCENA VI

Mastru Austinu e Prazzitu.

Mastru Austinu

(facendosi presso la comune) Egregiu professuri, avanti, avanti! Jemu parrannu: chi cosa aviti cumminatu?...

Prazzitu

Tuttu fattu. Procurai 'na curnetta, un bombardinu, un trummuni e tamburinu…

Mastru Austinu

Ma su' 'ntunati?

Prazzitu

Chi voldiri! Spiciali 'u tamburu...

Mastru Austinu

Mezza parola. Dunca: doppu ca trasi 'u Sinnacu, ccu tutti 'i tistimonii, 'i bannisti si divunu mettiri avanti 'a porta, pronti alla carica!

Prazzitu

Magnificamenti!

Mastru Austinu

Vui vi mittiti 'nta 'ssa porta di sala, in modu ca putiti vidiri a mia e ad iddi. Quannu ju vi fazzu signali, ca vi dicu: «pronti alla battaglia», vui ci faciti signali ad iddi, e attaccamu! …

Prazzitu

Divinamenti!

Mastru Austinu

Prima marcia riali e poi innu di Canibardi.

Prazzitu

Perfettamenti.

Mastru Austinu

'I sannu, a memoria?...

Prazzitu

Non dubita, hannu 'i carti.

Mastru Austinu

Ma di prima non si divunu fari vidiri di nuddu, oh!... Divi essiri gran sorpresa pri tutti.

Prazzitu

Ca sissignuri. Vossia guarda chi fazzu: ppi comora 'i fazzu mettiri di nascostu, ccu tutti 'i strumenti, dintra 'u finili, doppu c'hannu trasutu tutti, 'i fazzu vèniri 'nt' 'a sala cca appressu e li disponu alliniati davanti 'sta porta!...

Mastru Austinu

Benissimu!... Oh, 'n'autra cosa: comu farò a sapiri quannu sariti tutti intra?

Prazzitu

Ca vossignuria nni duna 'na parola d'ordini ed ju la gridu forti.

Mastru Austinu

Bravu! (lo bacia) Aviti na 'ntilicenza! Eccu: gridati accussí: Prufissuri, 'u contrabannu è sarvatu!

Prazzitu

Sissignori, non dubita.

Mastru Austinu

A rivederci, vo' jtavinni.

Prazzitu

Non m' 'a fa vidiri, vossia?

Mastru Austinu

Chi?

Prazzitu

A cappella?

Mastru Austinu

Nenti, nenti, non c'è tempu di pèrdiri.

Prazzitu

A vàja, ora, 'nta un mumentu!...

Mastru Austinu

In linia propriu eccezionali!... Siti l'unicu e sulu ca si pò vantari d'avilla vistu prima d' 'u tempu!... Ma... prima aspittati tanticchiedda... chiudu 'i porti, ppi non tràsiri nuddu (cautamente va a chiudere l'uscio di camera dei vecchi e quello di camera dei figli, con doppio giro di chiave, poi fa segno a Prazzitu di mettersi lontano) Chiú 'n funnu, chiú 'n funnu!... A linia retta, accussí, fermu 'ddocu! … (prende di tasca la chiave dell'usciolo di centro in fondo, l'apre con solennità, facendo apparire, in fondo al ripostiglio, un piccolo altare con l'immagine di San Giovanni Decollato, contornato di festoni di fiori di ostie e di candele accese) Eh?... chi vi nni pari?

Prazzitu

Ah!... Chi galantaria!... Chi cosa sbrennita!... Chi maravigghia ca addivi essiri ppi tutti!... Eccu, ora scappu, ca non c'è tempu di perdiri.

Mastru Austinu

Un mumentu (gli colma le tasche di dolciumi, poi gli versa da bere del rosolio in un bicchiere da vino) Biviti... alla saluti mia e di San Giuvanni Addicullatu.

Prazzitu

Di so' figghia e di so' mugghieri! …

Mastru Austinu

No, nenti, non occorri!... Va', arrivederci, e occhiu vivu! (lascia l'usciolo della improvvisata cappella socchiuso e accompagna Prazzitu fin sulla porta, ripetendogli) Dunca, ricordativi di tuttu: occhiu vivu e bacchetta pronta... Al comando: «pronti alla battaglia», attaccati ccu 'a marcia riali... (la voce si perde dentro l'ingresso. Pochi secondi di scena vuota).