TEMPESTA

Sul mar furioso, ne la note oribile,

Fisćia, tremendo, el vento;

La note nera dentro a tute l'aneme

Porta el più gran spavento

Par che la ziga¹⁶⁸ nel so tristo strepito

Le angosse de chi mor;¹⁶⁹

Par che la conta¹⁷⁰ quante grame vitime

Fa 'l mar co' 'l xe in furor

Quante famegie, quanta zente palida

Speta che sia finio

'Sto oror de tempo, che dispera le aneme

Che se rifugia in Dio!

Doman tornarà 'l sol nel çielo limpido,

El mar se quietarà,

Ma pescaori a le so' case povare

Doman ne tornarà

Doman el sol confermarà a dei orfani

La sentenza crudel

Che 'l vento ne la note, co 'l so' spasemo

Ga urlà via per el çiel

Almanco¹⁷¹ el sol scondendose drio nuvole

No amarizasse¹⁷² el luto,

Ma l'ironia de sto destin oribile

Fa torturar co tuto!