A VENEZIA

Quanto bela ti xe, Venezia mia!

Mi no posso finir mai d'amirarte

Paradiso sul mar, cuna¹⁹³ de l'arte,

Viver sempre e morir qua mi voria

Co' ti xe tuta piena de alegria

Ti ti me scaldi 'l cuor solo a vardarte;

Co' 'l çiel xe bruto e par che 'l vogia odiarte,

Sento in tel cuor 'na gran malinconia

Venezia cara, silenziosa e quieta,

Xe la belezza tua che à sugerio

Versi al zovene cuor mio de poeta;

Venezia, logo che no ga 'l secondo,

Te vogio ben come a 'na mare el fio:

Lontan da ti mi son fora del mondo