«AMAR, AMAR, AMAR»

Nina, d'amor ne parla el çiel rosà,

Le rare nuvolete,

El sol basso su l'aqua, imporporà,

Le picole barchete

Che su l'ondina placida, liziere,

Lontan le svola via

Tuto dise d'amor vose⁶ sinçere,

Bela Nineta mia

Se una vela se perde nel lontan

Paçifico orizonte;

Se co ela se perde un senso arcan

De contentezze sconte⁷,

De l'altre vele vien a nualtri in volta⁸

Più alegre sora 'l mar

Tute 'ste cosse, mia Nineta, 'scolta,

No le te fa pensar?

Varda el cocal⁹ che sora l'aqua svola:

Come che 'l ride: senti!

No par che anca lu creda a la parola

Dolçe e cara dei venti?

«Amar, amar», ne la so vose el canta:

«Amar, amar, amar»

Ti, mia Nineta, a la parola santa

No ti ghe vol badar?

Le nuvole, el cocal, el sol, l'ondina,

Varda, crede a l'amor

Solo el ridar del çiel, dolçe mia Nina,

Te dise gnente el cuor?

Pensa da novo, cara, al sentimento

Che me entusiasma mi:

Che le vele lontane o pur el vento

No diga gnente a ti?